Fai! denuncia les posibles consecuencies d’un minor n’asturianu

07 ochobre 07:34 2008 Imprimir

L’Asamblea Xeneral de Fai! acaba denunciar les posibles consecuencies d’un minor n’asturianu nun comunicáu que recueye la so postura énte la confirmación recién del Decanu de Filoloxía de la so intención de solucionar el conflictu abiertu en sen d’esta facultá cola execución d’un “minor”.

En resume, Fai! considera:

1. Que la propuesta del Decanu nun ta a l’altura de les necesidaes y capacidaes científiques de los propios estudiosos de la llingua asturiana na institución académica. Personal que vien demostrando la so capacidá, incluso nes situaciones más adverses, y que tien nesta reforma universitaria la oportunidá de quedar nel sitiu que merez.

2. Que la mencionada propuesta nun cubre les necesidaes formatives de los futuros filólogos que quieran tener como ámbitu d’estudiu y actuación la llingua asturiana.

3. Qu’un “minor” n’asturianu nun llegaría al mínimu de los conteníos básicos p’asegurar que la llingua pueda siguir siendo enseñada nos centros de primaria y secundaria por maestros y profesores filólogos cualificaos. Poro, l’horizonte d’una meyora educativa quedaría definitivamente descartáu.

4. Que si la concentración de tolos estudios d’asturianu na titulación propuesta supón la perda de materies qu’agora s’estudiaben per optatividá y llibre configuración, la Universidá asturiana tará renunciando a calces válidos pa la promoción y l’aproximación del alumnáu xeneral a esta área de conocimientu.

5. Qu’énte esta propuesta ye necesaria una respuesta desixente, reflexonada, pero desinteresada y firme, dende tolos sectores sensibles a la dignificación del estatus universitariu de la llingua asturiana: seyan estrictamente académicos, políticos, culturales, xuveniles, estudiantiles…

  Categories:
Loading Facebook Comments ...