Fai! amuesa’l so contentu por ver refugada la propuesta que condenaba a la llingua asturiana

30 xineru 08:34 2009 Imprimir

Fai! amuesa’l so contentu por ver claramente refugada la propuesta de grau de maxisteriu que condenaba a la llingua asturiana a salir de la escuela.

La organización, presente con estudiantes nel Claustru de la Universidá d’Uviéu, insta agora a la escuela de Maxisteriu, Rector y al Gobiernu asturianu a que reconduzan la situación de la única manera posible: dándo-y’l rangu de “mención” al asturianu al mesmu nivel que les otres árees docentes.

Fai! quier felicitar, per mediu d’esta nota de prensa, a los axentes sociales universitarios que refugaron l’intentu de sacar, otra vegada más, al idioma asturianu de les aules. Nesta ocasión impúsose la razón frente a la radicalidá de los mofientos postulaos anti-llingua asturiana, que namás buscaben eliminar tou rastru del idioma d’Asturies na formación del profesorau d’enseñanza primaria nun xestu que demuestra la so intolerancia, auto-odiu y despreciu pola cultura asturiana.

Asinamesmo, Fai! insta otra vuelta al Rector a cumplir les sos promeses electorales, meses dempués de qu’un miembru del claustru perteneciente a esta organización-y lo recordare na primer reunión del másimu órganu de debate universitariu. Pa los y les estudiantes de Fai!, “Vicente Gotor nun puede mirar pa otru llau mentres nes escueles y facultaes de la universidá qu’él gobierna se faen propuestes abiertamente illegales –en referencia a la non propuesta de la mención de llingua asturiana– presentaes como supuestamente democrátiques, polo que facemos una crítica abierta al so silenciu nestos díes previos a la votación de la Xunta d’Escuela de Maxisteriu”.

Pa la xente de Fai! “agora ye’l momentu de que dean la cara lo mesmo la Conseyería d’Educación, Gobiernu asturianu y el Rector pa da-y una salida digna al conflictu, “dexando al marxe soluciones intermedies, insuficientes a toles lluces, que nun lleguen a los mínimos almisibles” como pa Fai! “quedó demostrao tres de la crisis de filoloxía que culminó cola aprobación d’un probetayu Mínor”.

Pa la organización, “la movilización firme y ensin concesiones, de denuncia y desenmazcaramientu de postures d’imposición y anti-asturianes, ye l’únicu camín que puede llevar a la llingua asturiana al sitiu que-y correspuende nes instituciones y na universidᔠn’alusión clara a la exitosa concentración entamada pola Xunta pola Defensa de la Llingua Asturiana y Xunta Moza esti mañana, na que participaron un centenar d’alumnos y profesores y que foi sofitada por dellos miembros de Fai!.

  Categories:
Loading Facebook Comments ...