Factoría Sound desapiega en 2019 con un cartelu internacional de luxu

Factoría Sound desapiega en 2019 con un cartelu internacional de luxu
08 xineru 10:44 2019 Imprimir

El Factoría Sound d’Avilés desapiega en 2019 con un cartelu internacional de luxu nes cites del primer trimestre, que van ser el 8 y el 16 de febreru y el 22 de marzu. Los suecos Kamchatka, los estadounidenses Travers Brothership y Levi Parham inclúin Avilés como cita ineludible nes sos xires per España.

Factoría Sound llegó pa quedase y, nel so tercer añu, consolídase como una de les principales referencies pa los aficionaos a la música nel norte d’España. La conceyalía de Cultura dobla’l so sofitu al ciclu de conciertos, y programó un primer trimestre de 2019 con un cartelu de luxu. Van Ser dos bandes, los suecos Kamchatka y los estadounidenses Travers Brothership, y un solista d’influencia creciente, como ye’l tamién estadounidense Levi Parham.

Trés cites nel espaciu escénicu del centru cultural de l’avenida de Portugal: el 8 de febreru, con Travers Brothership; el 16 del mesmu mes, con Kamchatka; y el 22 de marzu, con Levi Parham. El preciu de les entraes sueltes pa cada unu de los conciertos, yá a la vienta, ye de 10 euros en vienta antemanada y 12 el mesmu día del recital. Si opten pol abonu pa los 3 conciertos, el costu ye de 22,50 euros. Les entraes podrán adquirise nes taquilles de la Casa de Cultura y, de forma telemática, na web https://entraes.liberbank.es/palaciovaldes.

El ciclu de concierto Factoría Sound nació con fuerza en 2017, termina esti 2018 con un sólidu combináu de grupos y solistes nacionales ya internacionales mientres tol añu, y empecipia el 2019 per tolo alto. A ritmu de blues, rythm and blues o rock, con bandes y solistes consolidaes y emerxentes, el cartelu d’esti primer trimestre confirma a Avilés como unu de los faros musicales del norte d’España.

Programación

– 8 de febreru. Travers Brothership. Avilés ye pel momento, al pie de Bilbao, la primer cita confirmada de la xira per España d’esta banda estadounidense formada en 2012 en Asheville, Carolina del Norte. A los hermanos  Eric y Kyle Travers xunióse-yos nesi añu Ian McIsaac, a los teclaos y percusión, y en 2014 la formación consolidóse tal que güei ye, con un cuartu integrante, Josh Clark, al baxu y a la voz. Dempués de tocar na so trayectoria al pie de grupos como Taj mahal o Leftlover Salmon, van llegar per primer vegada a Europa, de la mano del so segundu álbum d’estudiu, “Let the World Decide”. La so música tien reminiscencies de rock guitarreru, soul, funk y jam.

– 16 de febreru. Kamchatka. El tríu suecu Kamchatka, que grabó’l so primer discu en 2005, ta compuestu por Thomas ‘Juneor’ Andersson (guitarres y voz), Tobias Standvik (batería) y Per Wiberg, ex teclista de Opeth, Spiritual Beggars y Candlemass (baxu y voz). La so música bebe del blues rock de finales de los 60 y principios de los 70 del pasáu sieglu, con elementos del hard-rock, blues-rock, stoner rock y psychodelic rock. Na maleta, el so postreru LP, “Long Road Made Of Gold”, el sestu na so trayectoria. Nél, perfeccionen el so soníu, con aires soul y blues. A Avilés lleguen dende Madrid, n’una minigira per España.

– 22 de marzu. Levi Parham. Nacíu en Oklahoma, como’l más grande cantautor de la hestoria d’Estaos Xuníos, Woody Guthrie, al que considera como una de les sos principales influencies. Bebe nel mesmu vasu de la tradición del so estáu natal, la rica musicalidá del rural estadounidense, del folk al country, pero tamién del blues, del soul. Ye consideráu unu de los mayores talentos nuevos de la música del so país. El so últimu trabayu enagora, y col que s’atopa de xira, lleva por títulu “It’s all good”. Avilés comparte cartelu nel so viaxe per España con Madrid, Barcelona, Coruña, Bilbao, Valencia o Zaragoza.

  Categories: