Expo Robot 2018 y Uviéu Becomes Dixital son dos cites ineludibles n’Uviéu

Expo Robot 2018 y Uviéu Becomes Dixital son dos cites ineludibles n’Uviéu
10 avientu 09:29 2018 Imprimir

El martes, 11 d’avientu va celebrase Expo Robot 2018: “The future is coming” y el miércoles 12, Uviéu Becomes Dixital: “Enclinos de futuru y organizaciones d’altu rendimientu”,  dos cites ineludibles n’Uviéu para tar al día y conocer los enclinos de futuru.

El conceyal d’Economía y Empléu, Rubén Rosón, presentó la selmana pasada en rueda de prensa estos  “dos eventos con gran conteníu en tresformamientu dixital, modernización y esposición, amestaos a les nueves tecnoloxíes, a l’automatización y la robótica: Expo Robot 2018, un eventu empobináu a tolos públicos pero especialmente para empreses y profesionales y Uviéu Becomes Dixital: enclinos de futuru.”, indicó’l conceyal.

Expo Robot 2018 va apigurar robots, intelixencia artificial, drones, tecnoloxíes pa la salú, negociu o consumidor final que se van dar cita’l próximu 11 d’avientu nel Palaciu de Congresos d’Uviéu n’una esposición d’accesu llibre que van complementar les charres de referentes n’enclinos nestos ámbitos como son Marc Vidal y Cristina Urdiales. Amás, van realizase cuatro visites empuestes, trés dirixíes a escolares y una d’elles destinada a empreses. Esta xornada ta entamada por FOLIE Asturies, cola collaboración de Innovasturias.

“El miércoles, día 12 en La Ería”, añedió’l conceyal, “va celebrase Uviéu Becomes Dixital: enclinos de futuru”. Pela mañana va tener llugar un taller prácticu, impartíu por Jonathan Escobar Marín  y empobináu a Pymes nes que se va analizar el desenvolvimientu esponencial de les tecnoloxíes y la digitalización y van identificase les característiques que tienen de tener los equipos que lideren el tresformamientu dientro de les organizaciones. Pela tarde, Jonathan Escobar va falar de les organizaciones y profesionales del futuru n’una sesión abierta al públicu polo xeneral y va rematar la sesión con una mesa redonda de startups  y empreses asturianes que tán apurriendo soluciones innovadores. Esta actividá ta entamada por CTIC Centru Tecnolóxicu.

“Tratase de convertir a Uviéu nun referente en tresformamientu dixital. Gracies a FOLIE, a CTIC, a Innovasturias y a Uviéu Entama porque supieron consolidar la collaboración ente alministraciones públiques y privaes. Los beneficios pa los asturianos y los uvieinos son innumberables”, indicó’l responsable municipal d’Economía.

L’asistencia a dambes actividaes ye gratuita, previa inscripción na web d’Uviéu. Entama www.oviedoemprende.es/axenda. Persona de contactu: Roberto Bayón. Corréu: mentoroviedoemprende.es. Toes estes actividaes realizar nel marcu del Proyectu Uviéu Entama, el plan de sofitu al emprendimiento del Conceyu d’Uviéu.

  Categories: