Portada Turismu Exiptu afaya trés nueves tumbes alrodiu les pirámides de Guiza

Exiptu afaya trés nueves tumbes alrodiu les pirámides de Guiza

by redacción asturnews
Egito. Guiza - Esfinge - Foto: Ana Paula Hirama (https://www.flickr.com/photos/anapaulahrm/)

A pocos kilómetros al sur de les pirámides de Keops, Kefrén y Micerinos, una misión arqueolóxica exipcia afayó trés nueves tumbes nel desiertu de Guiza, ente les que s’atopa una que comparten dos sacerdotes d’hai más de 4.400 años.

Nel desiertu de Guiza, el Ministeriu d’Antigüedaes exipciu presentó esti sábadu les tumbes de los nuevos inquilinos de la necrópolis, Behen Wi Ka y Nuwi, dos sacerdotes de la V dinastía (2500-2350 a.C). “De primeres pensábamos que díbamos atopar tumbes del periodu tardíu (s.VII a.C.), pero atopamos xuna tumba del Imperiu Antiguu d’Exiptu, de la V dinastía. Tamos falando d’una tumba de 4.400 años”, dixo Mostafa Waziri, secretariu xeneral del Conseyu Supremu d’Antigüedaes exipciu.

Waziri esplica que la misión empezó’l pasáu agostu y, en removiendo más de 450 metros cúbicos d’escombros, afayaron trés tumbes y, pa la so sorpresa, una d’elles apinada de sarcófagos de madera y fragmentos en perfectu estáu de caltenimientu pertenecientes a los dos sacerdotes de la V dinastía. Dambos fueron soterraos na mesma tumba: Behen Wi Ka ostentaba siete títulos y yera el sacerdote de la purificación del faraón Kefrén, ente que Nuwi tenía cinco títulos, ente ellos el de sacerdote de Maat, la diosa de la xusticia y la verdá, acordies con la mitoloxía exipcia.

Les trés tumbes fueron amosaes a decenes de periodistes tres una rueda de prensa na escampada de les pirámides, a la qu’asistió’l ministru d’Antigüedaes d’Exiptu, Jaled al Enani. Les tumbes, dixebraes por pocos metros, escondense so les dunes y amuesen tres puertes de piedra caliar, un indicador del poder de los sacerdotes, yá que pa llograr tal material yera indispensable “el permisu del mesmu rei”, aseguró Waziri.

 

Tamién te podria gustar