Portada Conceyos Europa Equí da a conocer el programa Discover EU Inclusión

Europa Equí da a conocer el programa Discover EU Inclusión

by redacción asturnews

La Oficina de Movilidá Xuvenil Internacional d’Avilés, Europa Equí, va tar dando a conocer, mientres los próximos meses el programa Discover EU Inclusión.

El programa Européu Erasmus+ lleva dende 2006 realizando diverses acciones de movilidá pa la mocedá avilesino. Dientro d’esti proyectu enmárquense los programes DiscoverEU y DiscoverEU Inclusión, qu’ufierten a moces de 18 años residentes na Unión Europea o nun país acomuñáu la oportunidá d’afayar Europa al traviés d’esperiencies d’aprendizaxe.

DiscoverEU Inclusión ye una acción diseñada pola Comisión Europea pa facilitar la participación de mocedá con menos oportunidaes, esto ye, persones que por motivos económicos, sociales, culturales, xeográficos, de salú, orixe migrante, discapacidá, dificultaes d’aprendizaxe o por cualesquier otra razón tean discriminaos.

Al traviés d’esta acción les entidaes que trabayen con esti colectivu pueden solicitar financiamientu p’apurrir el sofitu necesariu por que estos mozos puedan viaxar. Van Poder participar un máximu de cinco acompañaos por una persona de sofitu si fuera necesariu.

Les candidatures podrán unviase dende’l martes 11  hasta’l  25 d’ochobre y solo van poder participar mozos que nacieren en 2004. Los escoyíos van llograr un bonu de viaxe y una tarxeta de descuentu DiscoverEU con descuentos en visites culturales, actividaes d’aprendizaxe, deportes, tresporte local, agospiamientu, comida, ente otros. Los viaxes van tener una duración d’ente 1 y 30 díes y podrán realizase ente’l 1 de marzu de 2023 y el 29 de febreru de 2024.

La Oficina de Movilidá Xuvenil Internacional d’Avilés, Europa Equí, va tar dando a conocer, mientres los próximos meses, dambos programes a los mozos. Europa Equí ye un proyectu desenvueltu dende’l Serviciu de Mocedá del Conceyu d’Avilés en collaboración cola Asociación Cultural En Construcción. Al traviés del programa Européu Erasmus+ y del Cuerpu Européu de Solidaridá lleven 16 años emprestando especial atención a aquellos proyectos que promueven la inclusión de moces con menos oportunidaes.

Tamién te podria gustar