Europa entama les cellebraciones de los 50 años del Tratáu de Roma

30 ochobre 04:27 2006 Imprimir

Les Instituciones Europees dieron lluz verde’l pasáu día 24 d’ochobre a los proyeutos y festeyos que van facese na Unión Europea con motivu del 50 aniversariu de la firma de los Trataos de Roma. Ente les xeres inxierénse alcuentros, conciertos, debates, un festival d’arte y un mini-festival de cine que va pasar per abondes ciudaes europees.
Alejo Vidal-Quadras, Vicepresidente del Parlamentu Européu y Margot Wallström, Vicepresidenta de la Comisión Europea, foron los encargaos de presentar el paquete de xeres. Ambos destacaron la importancia de da-y puxu al debate sobre’l futuru d’Europa aprovechando la celebración de los eventos programaos.
La campaña tien un doble oxetivu: per un lláu festeyar la llibertá, la paz y la prosperidá que la Unión Europea algamó a lo llargo de todos estos años, y per otru, facer reflexionar a los ciudadanos, n’especial a los x óvenes, sobre la Europa que quieren pal futuru. Per esti motivu diose prioridá al “Paquete Juventud”, qu’amesta una serie d’iniciatives como “Escueles Xuníes d’Europa”, pa camudar experiencies y opiniones ente los escolinos europeos; “Primavera d’Europa”, un alcuentru/debate pa xóvenes d’ente 7 y 17 años, y una Cumbre pa la xuventú en Roma.
El proyeutu nomáu “Les 50 cares d’Europa”, consiste nun alcuentru de 50 ciudadanos de la Unión Europea nacíos a lo llargo de los 50 años que pasaron dende la firma de los Trataos de Roma, nel que van camudase puntos de vista sobre cómo Europa influyó nes sos vides
Tamién se va celebrar un Festival de Cine Européu al aire llibre, programáu pa los meses de branu, que se desendolcará nes capitales caberes y en otres grandes ciudaes europees. Toles películes que se van exhibir tán finaciaes pol programa MEDIA, iguáu pa protexer la dixebra cultural y la herencia cinematográfica d’Europa.
La música va ser protagonista na iniciativa nomada “Conciertos pa Europa”, que se van celebrar el 9 de Mayu coincidiendo col festeyu del Día d’Europa que se vien faciendo dende 1985.
Y, per últimu, el Festival d’Arte Europalia, ya celebráu con exitú en 2005, que será ente ochobre de 2007 y febreru de 2008. Europalia centrará l’atención sobre los aspeutos culturales que tienen en común los paises miembros y sobre la diversidad de los 27 paises de la Unión. V haber esposiciones y eventos de teatru y danza. El festival parte con un presupuestu estimáu de 1,5 millones d’euros.

  Categories:
Loading Facebook Comments ...