Eugenia García, alumna del Julián Orbón, becada pola Royal Academy of Music de Londres

Eugenia García, alumna del Julián Orbón, becada pola Royal Academy of Music de Londres
19 xineru 08:46 2021 Imprimir

Eugenia García Cuesta, alumna del conservatorio Julián Orbón, vieno acabante ser becada pola Royal Academy of Music de Londres. Estudiante de sestu cursu d’Enseñances Profesionales de Viola, superó pruebes que consistieron na interpretación de dos pieces musicales, una presentación n’inglés y una entrevista personal. 

Eugenia García Cuesta, alumna del Conservatorio Municipal Profesional Julián Orbón d’Avilés, llogró una beca de la Royal Academy of Music de Londres, una de les instituciones musicales más prestixoses del mundu, pa realizar ellí a partir del próximu cursu, y mientres los siguientes cuatro años, los sos estudios cimeros de música. La beca cola prestixosa institución británica dexará-y completar los estudios cimeros, con una duración de cuatro años.

Eugenia, que va cumplir 18 años n’abril, ye alumna de sestu cursu d’Enseñances Profesionales de Viola, col profesor Rubén Menéndez Larfeuil. Pa la concesión de la beca, el tribunal de la institución londinense valoró la so maestría na execución de les pruebes online que-y fueron plantegaes.

Estes consistieron na grabación d’un vídeu nel qu’interpretó’l primer movimientu de la Suite de M. Reger y el primer movimientu del Conciertu en re mayor de F. A. Hoffmeister, acompañada al pianu pola profesora del conservatorio Narine Karapetyan. Coles mesmes, tuvo qu’ellaborar una presentación personal n’inglés y, finalmente, selmanes más tarde realizó una entrevista qu’incluyía una prueba d’analís y de cantar.

La hestórica Royal Academy of Music de Londres, que nel 2022 va cumplir el so segundu sieglu d’esistencia, ye una de les instituciones formatives nel ámbitu musical más prestixoses del mundu. Poles sos aules, nes que se formen anguaño estudiantes de más de 60 países, pasaron talentos del prestíu de Elton John; Simon Rattle, director mientres 16 años de la Orquesta Filarmónica de Berlín y güei director musical de la Sinfónica de Londres; la soprano Felicity Lott, o’l compositor Harrison Birtwistle.

  Categories: