Estrénase en Samartín esti vienres “L’Apocalipsis” de Xose Ramón Martín Ardines

Esti vienres 17 de xunetu a les ocho la tardi,el Teatru Municipal de Samartín del Rei Aurelio acueye l’estrenu de la obra teatru de Xose Ramón Martín Ardines, L’Apocalipsis,el camín que mos marca.

Esta obra ta enmarcada dientro los actos entamaos pola Sociedá Cultural y de Festexos de L’Entregu con motivu de les fiestes de La Llaguna 2009 y alrodiu de la coronación del Rei Aurelio 2009 que se fadrá nel descansu de la función, onde tendrá llugar el pregón de les fiestes. Plantégase esta obra nel entornu de la recreación de la Corte del Rei Aurelio que tolos años se fae’n L’Entregu coincidiendo coles fiestes de La Llaguna.

La trama desendólcase nel añu 768,nel conventu de Samiguel de Pedroso en Burgos onde alcuentren abellugu Munia, viuda del Rei Fruela al qu’acaben de matar, acompañada de los sos fíos Ximena y Alfonso,xunto a Adosinda,hermana de Fruela. Dellos personaxes deambulen pel escenariu,introducen la historia un ciegu y un lazarillu,que’n realidá son dos muyeres faciéndose pasar por homes, pa poder sobrevivir a les estremaes penuries de la dómina. El restu de personaxes son: l’Abadesa, Adosinda, hermana de Fruela;Munia,viuda de Fruela; Alduara,la criada, una Monxa,Gometiza la cántabra;otra Monxa,Auria la cántabra;Fátima,la musulmana;Ermengarda,una franca y Himiltrudis,una lombarda.

El Conventu de Samiguel de Pedroso ye un enclave abellugáu peles montañes onde l’autor fai coincidir nesti añu de 768, a los familiares de Fruela, una de les muyeres de Abderramán, Fátima. A la rapaza franca y la lombarda,representantes del reinu Carolinxu qu’aportaren al reinu astur ;asina comu’l Beatu de Lliébana, autor de los comentarios al Apocalipsis.

Trátase d’una obra de teatru histórica, onde s’incluye la torna d’un de los poemes presuntamente escritos por Abderramán I,dedicáu a una palmera.Dícese qu’Abderramán I introduxo la plantación de palmeres na península y que compuso’l poema recordando la so patria, al vese ante una de les palmeres que plantara nel so palaciu de Córdoba.

L’añu 768 corónase a Aurelio como Rei d’Asturies, añu en qu’Abderramán I domina una parte de la península dende Córdoba.Carlomagno ye coronáu Rei de los francos,Esteban III ye nomáu Papa a la muerte de Pablo I y el nomáu Beatu de Lliébana entama los sos pasos hacia‘l nel Monasteriu de Santo Toribio, fundáu per Alfonso I y onde a mediaos d’esti sieglu VIII fueren treslladaos los restos del obispu Toribio d’Astorga xunto a les reliquies que traxera de Tierra Santa,ente elles el Lignum Crucis, el cachu más grande de la cruz de Cristo qu’entá se conserva. Ellí Beato de Lliébana entama los sos comentarios al Apocalipsis y inclusu llegaría ser confesor de la reina Adosinda, hermana de Fruela. El Monasteriu de Samiguel de Pedroso,onde se desendolca la trama fuera fundáu pol Rei Fruela I nel añu 759 , ellí vivíen 28 monxes al mandu de l’abadesa Nonna Bella.

L’argumentu xira en tornu a la venganza d’una de les monxes del conventu, una de les cántabres, que descubre na familia del rei astur a los autores de les sos desgracies. Ya que pola so culpa tuvieren que facese monxes y abellugase nel conventu, dempués que Fruela I invadiera les sos tierres y matara a los sos pas, too ello mientres nos montes d’Asturies ta coronándose Rei a Aurelio.

La dirección y escenografía correspuende a Aurora Suárez Carrio, directora del Grupu Teatru Refaxu que pon n’escena la obra.

El Grupu Teatru Refaxu ye l’encargáu d’escenificar toles obres representaes dientro del Alcuentru Medieval en tornu a la figura del Rei Aurelio qu’entama la Sociedá Cultural y de Festexos L’Entregu ,escrites per autores del conceyu de Samartín del Rei Aurelio .

Nel I Alcuentru Medieval Pablo Rodríguez Medina escribió Ente querelles y doncelles,al añu siguiente tamién Pablo Rodríguez Medina fizo Texedora’Orbayu.L’añu pasáu Xulio Arbesú estrenó Les siete novies del Rei y nesta edición Martín Ardines presenta El Camín que mos marca.