Esti xueves preséntase’l nuevu númberu de la revista feminista “La Madeja” en La Semiente

by redacción asturnews | enero 20, 2016 7:19 pm

Esti 21 de Xineru d’esti nuevu añu, ye el día escoyíu pa retomar les charres y presentaciones de La Semiente, cola presentación del sextu númberu de la revista feminista “La Madeja” a partir de les 19,30 hores en L’Entregu.

Nesta primera actividá del añu van tar presentes como ya tuvieran n’otres vegaes la xente que-y da vida al Local Cambalache d’Uvieu, y en particular, van visitar el centru social entreguín parte del equipu d’edición de la revista feminista “La Madeja”

Esta revista, “La Madeja”, con 5 númberos más a les sos espaldes, ye un referente nel Estau Español en cuanto a publicaciones periódiques de temática feminista. Nesti sextu númberu, tratase’l tema de los Cuidaos, como siempre dende diferentes enfoques y estilos lliterarios. Pa cuntar más sobre esti númberu, a partir de les 19:30 hores del Xueves 21 de Xineru taran en La Semiente Irene S. Choya y Ana García Fernandez, que además de desgranar los conteníos de la revista en sí, van proponer alderiques que profundicen nel tema a tratar. Equí un adelantu:

“¿Son los cuidaos precauciones? Precauciones, quiciabes, ante la fraxilidá de la sobrevivencia. ¿Cuántes vegaes na vida escuchemos mandatos que facíen referencia a los cuidaos? Dedicar atención pa dalgo, pa `dalguien, pa nosotres mesmes, pal tiempu, pa la enfermedá, pa les decisiones, pa l’allegría, pal coles otres… Pal descuidar, tamién. Dedicar interés a la vieyura, a la muerte y a la vida, a les criances, a la economía. Dedica-y atención a quien ye diferente y a quien muevese al nuestru llau. Una vegada más, repensar los afectos. Pero tamién la fuerza de les nueses aiciones, les alianzes, los pies na tierra, los desengaños, les ciudades que habitamos. Nun escaecenos de les que nun tan. Y saber pedir y recibir. Dedicar interés a quien diz d’otra manera, a quien explora otros llinguaxes.
Nesti nuevu númberu de La Madeja quisimos sumerxinos,entrugar, compartir, indagar, dexar espaciu a les propuestes, a la escucha, a diferentes formes d’entender qué implica esto de los cuidaos dende perspectives feministes y por qué son tan importantes.”

Source URL: http://asturnews.com/esti-xueves-presentasel-nuevu-numberu-de-la-revista-feminista-la-madeja-en-la-semiente/