Esti vienres, visita guiada n’asturianu per Sabugo, el parque del Muelle y el paséu de la Ría con CaleyAvilés

Esti vienres, visita guiada n’asturianu per Sabugo, el parque del Muelle y el paséu de la Ría con CaleyAvilés
06 xunetu 08:19 2018 Imprimir
Con salida a les 19 hores na plaza d’El Carbayo, frente a la ilesia de Sabugo, esti vienres Caleyavilés ufre una nueva oportunidá pa descubrir dalgunos de los sitios más emblemáticos de la ciudá que nesti casu sedrán Sabugo, el parque del Muelle y el Paséu de la Ría.

El percorríu entama a les 19 hores na plaza d’El Carbayo, delantre la ilesia Sabugo. L’actividá ye de baldre, pero hai d’apuntase enantes llamando al teléfonu 985545508 o nel corréu electrónicu estayallingua@gmail.com

Esti ye’l tercer añu siguíu, col sofitu del púbicu nes dos primeres ediciones, nel que la Estaya de la Llingua del Conceyu d’Avilés organiza’l cilcu d’actividaes Caleyavilés, que fai que les persones participantes descubran secretos de la ciudá en conociendo dalgunos de los sos sitios más emblemáticos.

La visita d’esti vienres ye l’ecuador del ciclu que comprende cinco visites andando y qu’entamaron el día 18 de mayu, coincidiendo col Día Internacional de los Museos, y siguieron en xunu con un percorríu pel parque de La Madalena. L’asistencia a les actividaes creció respeuto a la edición anterior, muestra de lo popular que ye la iniciativa.

El programa de visites guiaes n’asturianu pa esti añu ye’l que vien darréu:

  • Vienres 18 de mayu

– 19 hores. Muséu de la Historia Urbana d’Avilés

  • Vienres 1 de xunu

– 19 hores. Parque de La Madalena. Puntu d’alcuentru: entrada al parque xunto al CEIP Enrique Alonso.

  • Vienres 6 de xunetu

– 19 hores. Barriu de Sabugo, parque d’El Muelle y Paséu de la Ría. Puntu d’alcuentru: plaza d’El Carbayo, delantre la ilesia vieya de Sabugo.

  • Vienres 6 d’agostu

– 19 hores. Parque Ferrera. Puntu d’alcuentru: Edificio de La Noria, dientro’l parque.

  • Vienres 7 de setiembre

– 19 hores. Cascu Históricu. Puntu d’alcuentru: plaza de España, delantre  la Casa Conceyu.

La duración más o menos de cada visita ye d’una hora y media, pa como muncho  25 persones. Les actividaes son de baldre y recomiéndase llevar calzáu cómodu. P’apuntase hai que llamar al teléfonu 985 545 508 o mandar un corréu electrónicu a estayallingua@gmail.com

Nos dos años enantes l’actividá aportó visitantes d’otros conceyos asturianos, a los que-yos prestó muncho descubrir d’una manera diferente una ciudá milenaria con una historia mui marcada per aciu de la evolución de la so traza urbana. Esti ciclu xurdió del ésitu de les feches en 2015 pel parque Ferrera y en 2016  al Muséu de la Historia Urbana nel Día Internacional de los Museos, cita que se caltuvo como puntu d’entamu del ciclu.

  Categories: