Esti vienres 27 entama la 39 Selmana de Les Lletres

Esti vienres 27 entama la 39 Selmana de Les Lletres
24 abril 13:18 2018 Imprimir

Más d’una ventena d’actividaes componen el programa de la 39 edición de la Selmana de les Lletres Asturianes, que va dar protagonismu a la lliteratura infantil y xuvenil y que se presentó esti llunes 25 d’abril n’Uviéu.

Talleres, esposiciones, homenaxes, presentacines de llibros, llectures públiques, certámenes lliterarios, alcuentros escolares, entregues de premios, visites guiaes, conciertos y representaciones teatrales son les actividaes que van festexar nos centros educativos l’entamar de Mayu y el Día de les Lletres Asturianes. Toes eses actividaes componen la programación de La Selmana qu’entama’l 27, a les 7 hores, col Alba de les lletres asturianes na escuela de Llorgozana (Carreño). L’Alba va rematase con un taller sobro la obra d’Antón de Marirreguera, primer autor conocíu en llingua asturiana, pa dar pasu, en Santolaya (Cabranes), a un homenaxe a la escritora local María Josefa Canellada y  una adaptación teatral de la so obra Montesín, ente que nel Centru de Cultura Antiguu Institutu de Xixón inaugurarase la esposición Falar ensin parar, que va tar abierta hasta’l domingu 20 de mayu.

El llunes 30 empiecen les visites en llingua asturiana por diverses localidaes: esi  día 30 n’Avilés; el martes 1 de mayu n’Uviéu; el 2 en Xixón, y la fin de selmana siguiente, en Ribesella.

El miércoles 2 de mayu, la Xunta Xeneral del Principáu acoyerá la tradicional llectura pública institucional de testos n’asturianu y gallego-asturianu y a les 19 hores celebrarase nel auditoriu de Siero l’espectáculu musical Xentiquina: una mirada a la lliteratura infantil. A les 19.30 hores nel Aula de les Metáfores de Grau  van apurrise los diplomes del V Premiu de Poesía que se convoca pal alumnáu d’esi conceyu nun actu poéticu musical que va cuntar cola presencia de Pablo X. Suárez, ganador del Premiu Xuan María Acebal de Poesía 2017.

La VI Feria del llibru y discu n’asturianu, entamada col Conceyu d’Avilés y l’Asociación de Llibreríes del Principáu, va inaugurase’l xueves 3 de mayu cola presentación de dos ediciones conmemoratives “Cúntame un cuentu” y “Cúntame un conto”. Trátase de dos obres, n’asturianu y gallego-asturianu, respectivamente, qu’inclúin relatos infantiles y xuveniles de 18 autores ilustraos por otros tantos dibuxantes. Como ye vezu, estos dos llibrosvan regalase’l vienres 4 de mayu, Día del Llibru Asturianu, en 53 puntos al mercar llibros y discos n’asturianu o en gallego-asturianu. La feria, instalada na plaza de Domingo Álvarez Acebal, va tar abierta hasta’l 6 de mayu.

Corvera va acoyer trés actos, entamando pol miércoles 2 con Versovera, un alcuentru poéticu nel centru cultural de Les Vegues; el vienres 4, nel Teatru El Llar, cola obra Crisis y otres histories, d’Adolfo Camilo Díaz; y el llunes 7, col recital poéticu Los testos de los músicos del país como piecines de teatru.

El xueves 3 de mayu, a les 18 hores, el teatru de Llaboral Ciudá de la Cultura ufrirá la gala de los premios del V Certame de Teatru Escolar, que se completa colos espectáculos El viaxe de Dorothy y Quixote, que van representanse nel mesmu allugamientu, el llunes 7 y el martes 8, respectivamente, a les 11 hores.

El vienres 4, el IES Víctor García de la Concha de Villaviciosa va ser l’escenariu del actu institucional de celebración de la Selmana de les Lletres cola entrega de los premios de los certames artísticu y lliterariu.

El gallego-asturianu va tar presente nel Auditoriu As Quintes, d’A Caridá (El Franco), el sábadu 5 de mayu, a les 19 hores, col Homenaxe ás nosas lletras, una representación d’As miseries de Llázaro de Tormes, al cargu de Carlos Alba, Cellero. Tratase d’una versión en gallego-asturianu de la obra Llázaro de Tormes, ganadora del I Premiu Nel Amaro de teatru profesional n’asturianu, que va poder esfrutase tamién el Teatru Vital Aza de La Pola (L.lena) a otru día, a les 20.00 hores. El programa d’actividaes ciérrase’l martes 8, na Sala Borrón d’Uviéu, cola tercer edición de Entaína a escribir, un concursu de microrrelatos improvisaos n’asturianu pa la mocedá.

Loading Facebook Comments ...