Esti miércoles ye l’últimu día pa participar nel Concursu d’Antroxu

Esti miércoles ye l’últimu día pa participar nel Concursu d’Antroxu
17 febreru 09:34 2021 Imprimir

Esti miércoles 17 ye l’últimu día pa poder participar nel concursu d’amarutes del Antroxu d’Avilés más atípicu por causa de la pandemia del COVID-19. Llucir el meyor disfraz y xubilo a la rede de forma risondera tien premiu.

La conceyalía de Festexos, al pie de la UCAYC entamen el tradicional Concursu d’Amarutes d’Antroxu, per primer vegada telemáticu, que va partir 3.000 euros en vales canxeables nel comerciu y la hostelería de la ciudá a los meyores nes categoríes de grupos, pareyes ya individual.

El concursu yá s’atopa en marcha, y nél pueden participar toes aquelles persones que lo deseyen. Pa faelo, tendrán de xubir un vídeu d’un máximu de 90 segundos dende’l so perfil de Twitter o Instragram, utilizando pa ello’l hashtag #AntroxuAvilésOnLine, y especificando el nome de la persona, pareya o grupu participante. La fecha llende pa faelo ye’l próximu miércoles, 17 de febreru.

Van ganar los y les concursantes, pero tamién el comerciu y l’hostelería d’Avilés que se sume a la iniciativa. Y ye que, col propósitu de llograr un Antroxu lo más participativo posible, por culpa de que non puede realizase nes cais, los premios, consistentes en vales de 25 euros cada unu, podrán trocase nos establecimientos de la ciudá, que tán sufriendo de forma especial los efectos de la pandemia.

Los premiaos van recibir un llistáu con tolos establecimientos collaboradores. Una llista que se va atopar coles mesmes disponible na páxina web de la UCAYC, www.ucayc.es, y a la que tamién se podrá aportar por aciu l’escaniáu d’un códigu QR.

El gastu de les tarxetes regalo podrá realizase ente’l 22 de febreru y el 30 de setiembre.

Más información

  Categories: