Portada Educación Esti martes presentase nel Aula Magna l’Atlas Sonoru de la LLingua Asturiana cola presencia del Rector

Esti martes presentase nel Aula Magna l’Atlas Sonoru de la LLingua Asturiana cola presencia del Rector

by asturnet

Vicente Gotor Santamaría, Rector de la Universidá d’Uviéu, va presidir esti martes 29 la presentación del Atlas Sonoru de la Llingua Asturiana, que se va facer nel Aula Magna de la Universidá y na que van participar Fernando Álvarez-Balbuena García, profesor de la Facultá de Filoloxía (Seminariu de Filoloxía Asturiana) y Jesús Suárez López, investigador del Muséu del Pueblu d’Asturies y director de la obra.

De fines del sieglu XIX, la llingua asturiana foi oxetu d’estudiu per parte de llingüistes y filólogos (Ake W. Munthe, Ramón Menéndez Pidal, María Josefa Canellada, Lorenzo Rodríguez-Castellano….) que publicaron obres de calter xeneral y monografíes dialectales de reconocida solvencia científica. Esti llabor d’estudiu allargóse tol sieglu XX, dando pie a una notable producción de publicaciones impreses, pero ensin dar a conocer un solu documentu sonoru qu’amosare la dimensión acústica d’esta llingua y de les sos variantes dialectales.

L’Atlas Sonoru de la Llingua Asturiana tien como oxetu enllenar esta carencia y amosar la diversidá llingüística d’Asturies “de viva voz”, pente medies de l’audición de testimonios orales: mitos y lleendes, cuentos populares, romances, cantares, rellatos yvivencies de la vida cotidiana, narraos por falantes naturales de cada zona.

Esta obra concíbese como un proyectu interdisciplinar y abiertu a la edición de grabaciones de campu feches por investigadores de diversos ámbitos académicos — historia, filoloxía, musicoloxía, socioloxía, etnoloxía, antropoloxía—, y tamién por profesores y alumnos de llingua asturiana, en particular, y toa mena de persones interesaes nel folclor, la lliteratura oral y la cultura tradicional d’Asturies.

Ente los años 2003 y 2008, el Muséu del Pueblu d’Asturies (Rede de Museos Etnográficos d’Asturies) tien editao cuatro CDs qu’abarquen una ventena de conceyos asturianos, cubriendo, en xunto, un terciu de la rexón. La edición d’esta serie de documentos sonoros espurriráse a entregues sucesives hasta algamar les cuatro grandes árees llingüístiques d’Asturies (oriental, central, occidental y gallego-asturianu), nun total de 12 volúmenes.

Tamién te podria gustar