Esti llunes 20 abrió na cai La Fruta la Esposición de Belenes d’Avilés

Esti llunes 20 abrió na cai La Fruta la Esposición de Belenes d’Avilés
20 avientu 20:03 2021 Imprimir

A partir d’esti llunes yá puen visitase los dolce Belenes que formen parte de la Esposición Colectiva que, nesta ocasión, va poder contemplase’l local de la cai La Fruta, númberu 11, en plenu corazón del cascu históricu avilesín.

Los y les visitantes, mayores y pequeños, van poder allantase con un percorríu visual de belenes tradicionales y populares, belenes en miniatura y belenes de cumes, facilitaos por coleccionistes y belenistas avilesinos.

Va un añu, cuando les andaes por Covid taben en plena espansión, optose por una esposición en distintos escaparates distribuyíos pela ciudá. Güei persisten les andaes, polo que nun hai que baxar la guardia y para aportar a la esposición hai que cumplir escrupulosamente los encamientos sanitarios, usu obligatoriu del mázcaru incluyíu.

Va poder vese dende’l llunes 20 d’avientu hasta’l vienres 7 de xineru incluyíu. L’horariu habitual ye de 11:00 a 14:00 hores pela mañana y per les tardes de 17:00 a 21.00 hores, con delles salvedaes como’l 24 d’avientu (Nuechebona) que va ser de 11:00 a 14:00 hores y de 17:00 a 20:00 hores, mesmu horariu qu’el 31 d’avientu (Nuechevieya). El 1 de xineru (festividá d’Añu Nuevu) los Belenes solo van poder visitase pela tarde, de 17:00 a 21:00 hores.

La Esposición de Belenes, que celebra’l so 22ª edición ye una de les cites tradicionales de la Navidá. Foi nel mes d’avientu de 1999, cuando Avilés, ciudá que siempres cuntó con una gran tradición belenista, acoyó por primer nel emblemáticu edificiu del Palaciu de La Ferrera, xuna esposición colectiva de belenes na que al belén municipal sumáronse les colecciones de trés belenistas avilesinos, siendo este’l xerme de la que güei conocemos como “Esposición Colectiva de Belenes d’Avilés”.

Per otra parte, a lo llargo de la selmana va quedar tamién instaláu’l tradicional Belén Monumental municipal, que volverá allugase na portalada d’accesu a la Ilesia de San Nicolás de Bari, na cai San Francisco.

Más información

  Categories: