Esti 28 de Xineru la Caravana pola Oficialidá percuerre’l Caudal

La Xunta pola Defensa de la Llingua Asturiana (XDLA) vien preparando dende la fin del añu pasáu una serie d’iniciatives ente los ataques que se tán viviendo hacia los pocos avances que se dan na normalización social del asturianu, por mor de los recursos de Delegación del Gobiernu a ordenances y reglamentos, campañes mediátiques contra la recuperación de la toponimia, la parálisis na presencia de la nuestra llingua na radiotelevisión pública y otres situaciones asemeyaes.

La XDLA viose la necesidá de responder “con actividaes movilizadores pa que la demanda de la oficialidá siga tando presente tol añu, más allá de les feches reivindicatives de siempre”. Too ello buscando tamién “aprovechar y afitar los llazos de collaboración abiertos colos alcaldes y conceyales que participaron na iniciativa de Conceyos pola Oficialidá”.

Y dempués de l’ésitu coles caravanes anteriores, pela Cuenca del Nalón y per Peñes, la XDLA vieno acabante de convocar esta tercera caravana que percorrerá varios conceyos del Valle del Nalón.

Esta tercera caravana de coches pola oficialidá va ser pel Valle del Caudal, el sábadu 28 de xineru y va salir pela mañana, a les 11,30 hores de la Plaza’l Mercáu de Cabanaquinta y va percorrer los conceyos d’Ayer, L.lena y Mieres. Nesti últimu conceyu sedrá’l final de la caravana onde s’estima como hora de llegada sobre les 14:00 hores.