Portada Conceyos Esther García presenta “Yo taba ellí” en Piedrasblancas y L.luarca

Esther García presenta “Yo taba ellí” en Piedrasblancas y L.luarca

by redacción asturnews
Invitación a la presentación nel Valey del llibru relatos "Yo taba ellí" de'Esther García

Cola presencia de l’autora, María Esther García López, y de Roberto González-Quevedo. profesor de la Universidá d’Uviéu y miembru de l’Academia de la Llingua Asturiana, esti xueves 26, a les 20 horas presentase en Piedrasblancas l’últimu llibru de la poetisa y académica “Yo taba ellí”.

La presentación va ser na Sala Polivalente del Centru Cultural Valey y va preceder la que tendrá lugar al día siguiente, el vienres 27, en L.luarca, na Casa de Cultura de Valdés, a la mesa hora. En L.luarca van facer compaña a la escritora valdesana Pedro Gilthoniel, profesor, escritor, viaxeru y dinamizador d’actividaes culturales, y Gumersindo Cuervo, conceyal de Cultura, amás del alcalde de Valdés, Simón Guardado.

“Yo taba ellí” ye’l nuevu volume d’Esther García López conformáu por ventiún rellatos de distinta factura y temática, a los qu’aune’l mesmu filu: la presencia de quien narra nel sitiu o llugar nel que trescurre l’acción: ella taba ellí, yo taba elle. Escritos cuando n’asturianu estándar, cuando na variante occidental, que ye la llingua materna de l’autora, aquellos rellatos que retraten la vida na Asturies rural, lo más d’ella yá perdida pero que tovía se caltién viva na memoria de quien narra y de la xente del llugar, son los qu’algamen mayor fondura psicolóxica y maña descriptiva.

María Esther García López (La Degol.lada, Valdés), escritora n’asturianu y castellanu, tien gran númberu d’obres publicaes d’estremaos xéneros: didáctiques y pedagóxiques, etnográfiques y llingüístiques, llibros de testu ya infantiles. Na so obra poética rescamplen los poemarios L.luribaga (2003), Zamparrampa (2004), Tiempu d’iviernu (2005), Faraguyas (Haikus) (2007) o Pisadas (2008). En narrativa destaquen El tatuaxe (1998), Historias de vida ya señas de muerte (2005) y A la gueta l’amor (2010). Tou esti llabor lliterariu valió-y p’algamar dellos premios, tanto en narrativa como en poesía. Dalgunos de los sos poemes tán musicalizaos por Ernesto Paredano y publicaos nel discu Alebrix (2007).

El volume de cuentos d’Esther García ye la primera de les novedaes de les que facía anuncia pa esta seronda la editorial Trabe y que van entamar a presentase darréu en dellos llugares d’Asturies.

 

Tamién te podria gustar