Uncategorized Esther García, Pilar Sánchez Vicente y Ramón d’Andrés son los Premios Timón 2016 by redacción asturnews 24 d'avientu, 2015 written by redacción asturnews 24 d'avientu, 2015 239 Los premios Timón 2016 yá tienen nomes: la poetisa y académica Esther García, la novelista Pilar Sánchez Vicente y l’académicu y profesor universitariu Ramón d’Andrés algamaben los galardones d’esti añu tres dela conceyamientu del xuráu esta selmana. Los Premios Timón destínense a reconocer la trayectoria creativa de los escritores d’Asturies y nesta edición, nes estayes lliteraries, optaren a los gallardones quienes nacieren nel añu 1.966 o anteriores. Trátase del X Premiu Timón, p’autores en llingua asturiana y n’eonaviego, y del VII Premio Timón, p’autores asturianos en llingua castellana. Igualmente, premiábase per aciu del IV Premiu Timón de Cultura Asturiana a asociaciones, sociedaes, fundaciones ya instituciones afitaes n’Asturies que tengan como fin la conservación y promoción de la identidá cultural de nueso, y a persones con una trayeutoria valoratible nesi ámbitu. Un xuráu formáu por Carlos Espina Alonso, Humberto Gonzali, Illán Gonzali, Xicu Monteserín y María Xosé Rodríguez, y actuando de secretaria María Teresa González Cobos, aconceyose’l pasáu martes 22 d’avientu alcordando otorgar les trés modalidaes de los Premios Timón 2016. Asina, el X Premiu Timón llógralu l’autora valdesana Eshter García López; el VII Premio Timón ye pa la escritora xixonesa Pilar Sánchez Vicente; y el IV Premiu Timón de Cultura Asturiana recái nel filólogu Ramón d’Andrés. Los gallardones correspondientes consisten nuna obra del escultor y ceramista xixonés Jesús Castañón pa cada modalidá, y van entregase mientres la cellebración de la edición oncena de L’Arribada en 2016. Los ganadores anteriores fueron; del Premiu Timón, Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009), Roberto González-Quevedo (2010), Vicente García Oliva (2011), Antón García (2012), Miguel Rojo (2013), Xosé Bolado (2014) y Esther Prieto (2015); del Premio Timón, Luis Fernández Roces (2010), Juan Méjica (2011), Fernando Menéndez (2012), Gonzalo Suárez (2013), Carmen Ruiz-Tilve (2014) y Francisco García Pérez (2015); y del Premiu Timón de Cultura Asturiana l’Asociación Cultural Ensame Sidreru (2013), la Xunta pola Defensa de la Llingua Asturiana (2014) y l’Asociación pola Recuperación de Sidros y Comedies “El Cencerru” (2015). Esther García López Mª. Esther García López nació en La Degol.lada, nel conceyu Valdés. Ye llicenciada en Pedagoxía, esperta en Filoloxía Asturiana pola Universidá d’Uviéu y mayestra de Primera Enseñanza, amás de miembru de l’Academia de la Llingua Asturiana dende 2002. Tien publicao, ente otro, los poemarios L.luribaga (2003), Zamparrampa (2004), Tiempu d’iviernu (2005), Faraguyas (2007) y Pisadas (2008), col que consigue’l Premiu Uviéu de poesía, 2006. En narrativa destaquen El tatuaxe (1998) y Historias de vida ya señas de muerte (2005). Esti llabor ta viéndose reconocíu col algame de varios premios; amás del Fernández Lema de L.l.uarca col rellatu Performance (2007), el Xosé Álvarez (2007) del Centru Asturianu de Madrí, col cuentu La maestra, y el León Delestal (2009) con La boda. Ye autora de dellos títulos de lliteratura infantil como Musical-landia (2008) Menú de versos (2009) y el caberu, Deva y el Pitín (2010). Alredor de la quintana ye una obra que recueyi dellos artículos publicaos en prensa, nos años 2009-2010 nel especial “La nueva quintana”. En 2015 publica’l llibru de rellatos Yo taba ellí. Ta presente en bien d’antoloxíes lliteraries y ye autora de llibros y publicaciones de didáctiva ya investigación etnográfica ya histórica, llibros de testu y cuentos alrodiu la llingua y la cultura de nueso. Pilar Sánchez Vicente Pilar Sánchez Vicente ye natural de Xixón. Historiadora y profesional de la información, n’actualidá desarrolla funciones como archivera del Tribunal Superior de Xusticia d’Asturies. Foi guionista y presentadora de Televisión Española y de la so Canal Internacional. Tamién presidió l’Asociación Asturiana de Archiveros, Documentalistas y Museólogos; l’Asociación Profesional de Especialistas en Información; y l’Asociación de Escritores de Asturias (AEA). Ye autora de numberosos artículos y publicaciones venceyaos a la Historia, la muyer, la mocedá y el turismu. En 2011 publicó Comadres, la so novela primera, a la que siguen Gontrodo, la hija de la Luna (2005), La Diosa contra Roma (2008), Operación Drácula (2010) y Luciérnagas en la Memoria (2013). En 2015 perfái con Luz Pontón y Alba Fernández Starczewska El fantásticu viaxe de Selene, primer cómic n’asturianu ya inglés al empar. Ramón d’Andrés Ramón d’Andrés ye un filólogu especializáu nel estudiu de la llingua asturiana. Ye miembru de númberu de l’Academia de la Llingua Asturiana, onde trabayó nes sos Normes Ortográfiques, Gramática y Diccionariu, y miembru dende 2012 del Real Institutu d’Estudios Asturianos. Nel periodu gubernamental 2003-2007 exerció’l cargu de Xefe de la Oficina de Política Llingüística del Principáu d’Asturies. Ente la so obra de divulgación de la realidá idiomática asturiana destaquenAllugamientu de los pronomes átonos col verbu n’asturianu (1993), Encuesta sociollingüística nuna parroquia asturiana (Deva-Xixón) (1993), Gramática práctica de asturiano (1997), Vocabulariu asturianu de la mina (1997, coautor xunto con Manuel d’Andrés), Reivindicación llingüística: unes reflexones (2002), Cuestiones d’asturianu normativu (3 vols., 2001-2003), Juicios sobre la lengua asturiana. Algunas cuestiones básicas acerca del debate lingüístico en Asturias (2002), Diccionario Toponímico del Concejo de Gijón (2008), L’asturianu que vien. Observaciones y suxerencies sobre l’asturianu normativu y el so usu (2008), Palabres nueves n’asturianu. Proyectu Observatoriu Asturianu de Neoloxía y Terminoloxía (AsturNeo). Informe de los años 2010, 2011 y 2012 (2013), Franco nos diccionarios y otres impertinencies alredor del llinguaxe y les llingües (2013) y Gramática comparada de las lenguas ibéricas (2013). Esther GarcíaL'ArribadaPilar Sánchez VicentePremios TimónRamón d'AndrésVagamar Lliteraria 0 FacebookTwitterPinterestEmail Anterior CCOO pide la dimisión del Vicerrector de Profesoráu pol casu Alarcos siguiente Aprobada la memoria del Parque Tecnolóxicu Avilés “Isla de la Innovación” Tamién te podria gustar La normalización llingüística afitase dafechu nel Parlamentu Avilés dedica’l so XIX Foru Solidariu a la... La Guerra Civil protagoniza una esposición n’El Coto El Boulevard de les Artesaníes torna al Campu... El Festival de Venecia empecipia con una película... Taylor Swift trunfa nos MTV MVA y anuncia... Asturies sigue a vueltes cola especialidá d’Asturianu emplegando... El Conservatorio Julián Orbón celebra so IV Selmana... El Conceyu otorga la Medaya d’oru a la... Les xornaes de puertes abiertes de les escueles...