Esther García: “La lliteratura asturiana vive un momentu d’esplendor pese a les torgues que sufre l’asturianu”

Esther García tien espublizaos una montonera llibros empobinaos al públicu infantil, amás d’una importante producción poética y de narrativa curtia, premiada con importantes gallardones, ye tamién articulista de La Nueva España y miembru de l’Academia de la Llingua Asturiana. L’últimu de los premios que recibió foi l’accésit Xosé Lleón Delestal del Centru Asturianu de Madrid pol rellatu “La boda”. Falamos cola autora, que reflexona sobre’l momentu que vive, los sos proyectos, la situación de la lliteratura asturiana…

-Lleva dellos años enllenos de premios perimportantes, ¿ayuden nel so casu al llabor d’escritora estes convocatories, de qué manera?

-Participar nun concursu ye una decisión que nun ye fácil de tomar. A min, dame un poco de reparu. Espones la to obra a un xuráu que va a mirala con lupa y entós tienes que tar mentalizáu. Pero, d’otra miente ye una forma de vencer la pereza que da poner al drechu los testos que vas escribiendo y si nun ye asina lo mesmo queden per tiempu pelos caxones. Llueu xuega un papel importante la calidá de lo que s’unvia pero tamién depende del gustu del xuráu y otres circunstancies.

-Escribe narrativa curtia, poesía, ensayu, y subxéneros tán poco habituales na lliteratura asturiana como’l h.aiku xaponés, ¿qué-y falta por facer como escritora?

-Fáltame escribir teatru . y d’esto tengo delles cosuques pa neños, ensin publicar. Pero sobre too, prestaríame tener sosiegu pa escribir una novela. Hasta güei nun lu tuvi. Pero too s’andará.

-Apocayá xubilóse del so trabayu como maestra, ¿tendrá tiempu agora pa metese na xera d’escribir una novela o qué otros proyectos tien en mente?

-0Sí, paez que cuando te xubiles del trabayu que te fai andar contra reló toa una vida, que vas tener tiempu pa munches coses. Entovía nun pudi saboriar bien esta nueva situación personal. Ún de los mios enfotos, dende llueu, como dixi, ye escribir una novela. Primero tengo’l compromisu conmigo mesma d’acabar la tesis doctoral que tengo a medies. Esto lleva muncha concentración y per otru llau, tampoco quixera apartame d’esti mundu lliterariu nel que toi encantada. Asina que m’espera estos años munchu llabor.

-Dende’l so puntu de vista, ¿qué momentu vive la lliteratura asturiana?

-La lliteratura asturiana vive un momentu d’esplendor, nunca na hestoria de la llingua s’escribió tanto, nin de la calidá de la lliteratura n’asturianu güei, en tolos xéneros. La estaya de la lliteratura ye una de les más granibles nesti procesu de recuperación de la llingua. Ta a l’atol d’otres lliteratures nes demás llingües del Estáu, namás que sufriendo les torgues que toos conocemos.

-¿Consiguieron los escritores asturianos facese con un públicu ampliu nos años últimos?

-Sí, pienso que sí, pero entovía habría que llegar a más xente. Los escritores escribimos pa que nos llean y pa eso fai falta que se potencie políticamente’l procesu de normalización. Falta la llingua nos medios de comunicación, que ye güei por güei , testimonial. Falta apostar por una escolarización en condiciones, ensin competencia con optatives, con profesoráu en plantilla, y nes mesmes condiciones que les demás materies. Hai que dexase de parches mal puestos. Llevamos yá venti años dende qu’entamó la escolarización y siguimos con milenta irregularidaes, que munchos conocemos bien.

D’otra miente, tal tema de la distribución y l’espardimientu de la nuesa lliteratura, que ye penosa. Dalgunos paecen llibros pantasma. La xente va mercalos y en cuanto dexen de ser novedá tienen problemes pa consiguilos. Fai falta una publicidá dende los medios de comunicación de los llibros escritos n’asturianu, con programes sobre lliteratura, entrevistes, tertulies, etc. Que la xente sepa lo que se publica y llueu que los llibros tean nes llibreríes en llugar preferente o polo menos nes mesmes condiciones qu’otros. A veces, paez que tán escondíos.

-¿Qué xéneros o temátiques albidra necesarios p’afitar un futuru granible?

-Los xéneros hai que cultivalos toos, Nesti momentu pienso que’l xéneru dramáticu ye’l menos cultiváu. Tamién si atendemos a subxéneros fai falta cultivar más el xéneru periodísticu. Sobre too en periódicos de gran tirada que son los que lleguen a tolos públicos.

-¿Cómo ve’l llabor de les editoriales asturianes, en qué han meyorar?

-Les publicaciones, en xeneral son dignes, y tenemos editoriales de categoría, pero llueu falla la distribución, ruémpese la cadena.

-¿Qué papel ha xugar la lliteratura asturiana na normalización del asturianu al so xuiciu?

-La lliteratura xuega un papel mui importante na normalización del asturianu, pero, como dixi ye como una cadena, si se ruempe ésta nun llega al públicu. Los llectores tienen que tar preparaos y concienciaos pa lleer n’asturianu y eso depende de munchos factores: escolarización dafechu y de calidá, medios de comunicación n’asturianu, toponimia, señalización, direutorios de tolos establecimientos públicos y otros munchos aspeutos, que se resumen asina : oficialidá. Y sobraríen entós munches disculpes.

-Como escritora na variante occidental del asturianu, ¿considera suficientes les ferramientes de la normativa actual pa escribir na variante occidental?

-Escribo n’occidental pero muncho más n’estándar, si miro ocho años p’atrás de collaboración na prensa, llevo fueyes y fueyes escrites nel estándar llingüísticu y de tolos temes. Escribo n’occidental, sobre too, lo que ye poesía y lliteratura en xeneral porque espreso los mios sentimientos y salme la llingua d’aquella fastera, la que faléi dende nena y más porque me paez que ye riqueza pal idioma. Yo cuando escribo n’occidental fáigolo cola normativa de l’Academia de la Llingua.

-¿Cómo ve la lliteratura creada pola nomada tercer xeneración del Surdimientu?

-Paezme que tien la frescura de la mocedá y que tán faciendo lliteratura de calidá Pienso qu’hai que promocionar los nuesos poetes y escritores más mozos, que tán garrando con fuercia’l testigu de los que yá tenemos años. De toles maneres siempre volvemos a lo mesmo. Si nun se-y da al asturianu l’estatus d’oficialidá que llevaría emparexáu, ente otres munches coses, una bona política d’espardimientu de la nuesa lliteratura, esti enfotu de los más xóvenes pue dir decayendo Los llibros publicaos pueden dormir en cualquier requexu y nun se sabe onde van dir parar. Los escritores necesitamos llectores y pa eso la llingua tien que tar normalizada, nun basta la normativización. Si una bona parte de la población ye analfabeta na so propia llingua, nos tiempos que cuerren, ta cavándose la tumba de la llingua asturiana. Nun sé si dalgún día se buscarán responsables, pero haber hailos.

-¿Ponen tola atención que merez la lliteratura asturiana los medios de comunicación?

-Non, en xeneral, non. Habría muncho que falar d’esto. Necesítase poner los medios pa facer una promoción de los llibros publicaos n’asturianu. Habría qu’incluir na radio y na televisión programes onde los propios escritores pudieren dar a conocer la so lliteratura. Güei esto ye testimonial. Tendríamos que tener seiciones na prensa rexonal dedicaes sólo a lliteratura. Y más espacios n’asturianu. En realidá somos pocos y munchos menos los que son conocíos. Lleémonos unos a otros pero fáltanos enanchar el tipu de públicu al que pueda llegar la llitertura asturiana. Nun nos engañemos. Entovía se pue ver nos medios, programes diglósicos y programes que traten la llingua asturiana como una llingua rural y de poco altor, cuando güei la lliteratura tien el mesmu altor y calidá que pue tener lo fecho en castellán n’Asturies y comparable tamién a otres lliteratures de llingües minoritaries.