Portada Política Estefanía Torres de Podemos xura como Eurodiputada en llingua asturiana nun xestu significativu

Estefanía Torres de Podemos xura como Eurodiputada en llingua asturiana nun xestu significativu

by asturnet

La nueva eurodiputada de Podemos, l’asturiana Estefanía Torres, va xurar güei n’asturianu’l so cargu pa sustituyir na Eurocámara al dirixente de Podemos Pablo Echenique, qu’arrenunció al escañu pa ser cabeza de llista nes elecciones autonómiques del próximu 24 de mayu n’Aragón. El xestu yera bien acoyidu ayeri nes redes sociales onde l’asturianismu sigue desixendo un pronunciamientu sobro la oficialidá.

Según informó la formación política que lidera Pablo Iglesias, col que va compartir escañu en Bruxeles, pidió tar na Comisión d’Agricultura y Desenvolvimientu Rural y tamién na de Mediu Ambiente, Salú Pública y Seguridá Alimentaria. Coles mesmes, tamién va formar parte d’un intergrupo parlamentariu de Minoríes Llingüístiques «pa da-y voz a otra minoría escaecida como ye la llingua asturiana».

Estefanía Torres, que se va convertir asina al pie de Tania González na segunda eurodiputada asturiana de Podemos, comprometióse a cobrar el salariu mínimu belga, 1.502 euros al mes.

La eurodiputada, politóloga y venceyada a Somos Asturies, aseguró ayeri que va tar nel Parlamentu «al serviciu de los de baxo, de les invisibles y los desanunciaos», y qu’espera contribuyir col so trabayu «a devolve-y el so poder lexítimu a los nuesos pueblos».

Tamién te podria gustar