Esta ye la convocatoria de les beques pal cursu 2018/2019

Esta ye la convocatoria de les beques pal cursu 2018/2019
23 agostu 09:06 2018 Imprimir

El Boletín Oficial del Estáu (BOE) publicó esti xueves pasau 16 d’agostu’l resolvimientu pol que se convoquen beques de calter xeneral pal cursu académicu 2018-2019 pa estudiantes que cursen estudios postobligatorios.

Asina va poder solicitar estes ayudes l’alumnáu que nun supere una determinada renta y/o patrimoniu familiar, que cumpla unos determinaos requisitos d’aprovechamientu académicu y atópese cursando Bachilleratu, Formación Profesional de grau mediu, cimeru y básica, Enseñances artístiques, deportives, estudios relixosos y militares cimeros, idiomes n’escueles oficiales y enseñances universitaries.

La solicitú tendrá de rellenase por aciu el formulariu accesible per vía telemática al traviés de la see electrónica del Departamentu na dirección https://see.educacion.gob.es nel apartáu correspondiente a Trámites y Servicios o na dirección electrónica www.mecd.gob.es.

Los plazos pa presentar la solicitú van estendese hasta’l 15 d’ochobre de 2018, inclusive, pa los estudiantes universitarios, y el 1 d’ochobre de 2018, inclusive, pa los estudiantes non universitarios. La cuantía de la beca de matrícula pa estudiantes universitarios va cubrir l’importe de los creitos de que se matricularen per primer vegada nel cursu 2018-2019 y la cuantía fixa amestada a la renta del estudiante –universitarios y non universitarios– va ser de 1.600 euros.

Per otra parte, la cuantía fixa amestada a la residencia del estudiante mientres el cursu escolar va ser de 1.500 euros tantu pa universitarios y non universitarios, ente que la nueva cantidá fixa amestada a la excelencia académica varia ente los 50 y 125 euros.

La beca básica pa estudiantes non universitarios va ser de 200 euros y la cuantía variable y distinto pa los distintos solicitantes va resultar de la ponderación de la nota media del espediente del estudiante y de la so renta familiar, que’l so importe mínimu va ser de 60 euros.

L’estáu de tramitación del procedimientu va poder consultase na dirección electrónica https://see.educacion.gob.es, que va recoyer la situación de tramitación de les solicitúes en caúna de les universidaes y alministraciones educatives.