Espertos de Nava y Bimenes participen na ellaboración d’un llibru européu sobro música tradicional

La tradición sonora europea, en comuña. Músicos y profesores de les escueles de música de Nava y Bimenes participen na ellaboración d’un manual de repertoriu y métodu de música tradicional qu’ultimen espertos de seis países europeos. Los representantes asturianos participen dende güei en Finlandia na segunda seisión de trabayu’l proyectu comunitariu ‘Entramus’, que pretende da-y puxu a los sones tradicionales d’Europa.

Trátase del segundu alcuentru de los países qu’integren el grupu, depués de la primer toma de contactu que tuvo llugar el pasáu mes de payares n’Asturies, cuya participación nel proyectu ta representada pola Escuela de música del Ayuntamientu de Nava y la Escuela de música tradicional de l’asociación ‘Los Yerbatos’ de Bimenes, dambes encuadraes na Mancomunidá de la Sidra.

Nesta ocasión, los profesores de dambos centros d’enseñanza musical, acompañaos de técnicos de la propia Mancomunidá, perfilen hasta’l prósimu domingu na llocalidá finlandesa de Loimaa, a unos 150 quilómetros de Helsinki, tanto los conteníos del llibru que se prepara como los oxetivos mesmos del proyectu ‘Entramus’, avaláu espresamente pola Unión Europea al traviés del programa Sócrates.

Xunta la Mancomunidá de la Comarca de la Sidra, intégrense na rede europea d’escueles de música tradicional asociaciones y centros de Marinha Grande, en Portugal; Saint Groux, en Francia; Rotterdam, n’Holanda; Cosenza y Prato, n’Italia; y de la llocalidá de Loimaa, en Finlandia.