Portada Educación Escolinos de primaria y secundaria denfenden la creatividá nel mediuambiente

Escolinos de primaria y secundaria denfenden la creatividá nel mediuambiente

by redacción asturnews
Un momentu del actu Homenaxe d'escolinos a Tonucci na Universidá

L’Área de Didáctica de la Espresión Plástica de la Universidá d’Uviéu desenvolvió esti martes una xornada con escolinos de dellos centros de Primaria y Secundaria, sol títulu “Xente menudo, menudes idees (homenaxe a Francesco Tonucci)”, nel Salón d’actos de la Facultá de Formación del Profesoráu y Educación.

Los estudiantes presentaron proyectos que tienen como exa’l reciclaxe y la ecoloxía, enfocaos dende la educación artística. Les palabres de bienvenida tuvieron a cargu del decanu de la facultá, Juan Carlos San Pedro, quien señaló qu’esta actividá celebrase nel marcu de la próxima visita de Francesco Tonucci pa ser investíu doctor honoris causa pola Universidá d’Uviéu.

Nel actu intervieno alumnáu de 6º de Primaria del CP Evaristo Valle, de Xixón; de 1º d’ESO del Colexu Sta. Teresa de Jesús, d’Uviéu; y de 4º d’ESO del IES Sta. Cristina de L.lena, de La Pola, acompañáu del so profesoráu: Almudena Domínguez, Yolanda del Cura y Sonia Fernández, respectivamente. Tamién intervieno Dalia Monge, asesora del proyectu “Xixón, Capital del Reciclaje” de EMULSA.

Les alumnes y alumnos del CP Evaristo Valle esplicaron los proyectos de reciclaxe y medioambiente llevaos a cabu nel so centru, y cómo naz el so nuevu proyectu, “Bye Bye Plastic Bags”.  Un enorme pez realizáu con bolses de plásticu, bien visible nel patiu del uvieín Colexu Sta. Teresa de Jesús, ye’l símbolu col que l’alumnáu trata de denunciar el dañu que causa la basura na fauna marina. 

L’alumnáu del IES Sta. Cristina de L.lena tomaron conciencia del problema medioambiental que supón el consumu escesivu de papel d’aluminiu, y de fechu munchos d’ellos yá prefieren llevar el so tentempié nun portabocadillos. Ensin dulda influyó-yos el proyectu “Al Minimum”, qu’incluyó distintes instalaciones artístiques, como una gran escultura d’aluminiu nel hall del institutu. Nel actu. la so profesora Sonia Fernández mentó “la gran potencialidá que tien l’asignatura de plástica pa trabayar otros conteníos y pa realizar trabayos interdisciplinares”.

Pela so parte, Dalia Monge Suárez faló del proyectu “Xixón, Capital del Reciclaxe” y de cómo promueve la concienciación medioambiental ciudadana. Dende’l so puntu de vista, la realización d’obres de reciclaje artísticu facilita la xeneración de proyectos de collaboración, y, como s’esponen en llugares comunes, pueden arimar de manera emocional a tola comunidá escolar y animala a participar”.

El decanu animó a los mozos a siguir alantre coles sos iniciatives, y afirmó que les actividaes de l’Área de Didáctica de la Espresión Plástica “nun allégrennos solo la mente y los espacios, sinón que van muncho más allá, y una prueba d’ello ye la importancia d’esta xornada y la respuesta de públicu que tuvo”.

Tamién te podria gustar