Entregáronse los diplomes de la Escuela d’Asturianía

El Conseyeru de Xusticia, Francisco Javier García Valledor, clausuró’l primer Cursu de la Segunda Edición de la Escuela d’Asturianía, xunta los responsables d’esta Escuela y los del Conseyu de Comunidaes ayeri, xueves 28 de xunetu a les 19.30 hores nel Teatru Filarmónica. Amás del Conseyeru, nel actu intervinieron Mª Jose Ramos Rubiera, Conseyera de la Presidencia, y Manuel Fernández de la Cera, Presidente del Conseyu de Comunidaes Asturianes.
Esti programa, que tuvo la so primer promoción ente los años 2002 y 2004 ufierta a los fíos de los emigrantes una formación afayadiza de l’Asturies actual y afalalos a participar nes actividaes de los centros y cases asturianes del esterior. Atendiendo a ello, el Plan Integral d’Emigración (2004-2007) incorpora la Escuela de Veranu d’Asturianía dientro la so cuarta estaya: “Pa que los asturianos del mundu s’organicen en comunidá”, como llínea d’ actuación xestionada pol Conseyu de Comunidaes.
Los oxetivos de la Escuela son l’afondamientu del significáu de la “Asturianía” y el so ordenamientu normativu; divulgar la estructura, organización y funcionamientu del Conseyu de Comunidaes Asturianes y de los centros asturianos y entidaes asemeyaes homologaes pol Principáu; potenciar la conservación de les nuestres tradiciones y velar poles características esenciales y diferenciadoras de la nuestra cultura popular. El programa tamien tien una parte formativa pa cualificar monitores de cultura y música tradicional asturianes que puedan formar a la so vez a otres persones y dinamizar l’actividá cultural nos sos centros asturianos.
El Plan d’estudios desenvuelvese nun ciclu de tres cursos de 15 díes caún que se van desendolcar n’Uvieu los meses de xunetu de 2005, 2006 y 2007, con un total de 300 hores llectivas (100 hores por cursu). L’alumnáu puede escoyer ente les especialidaes de Baile Tradicional o Gaita. Y al final del ciclu reciben un “Diploma de Monitor/a de Cultura y Música Tradicional Asturianes”, que que son los que recoyeron ayeri los participantes d’esta segunda promoción.
Nel so discursu, Valledor destacó qu’esta escuela ‘facilita la participación y la so vinculación con Asturies de los descendientes de la emigración, que ye un de los oxetivos de l’aicción del gobiernu pa los prósimos años, considerando qu’hai un importante númberu d’asturianos y asturianes nacíos fuera d’Asturies que representen un autenticu capital social pa la nuestra comunidá, que de nenguna manera podemos obviar’, asina como tamien ‘val d’elementu d’apoyu a les manifestaciones de cultura asturiana que s’entamen fuera d’Asturies, tanto les nueves manifestaciones artístiques, como aquelles otres más tradicionales dientro l’acerbu cultural asturianu, y esto tien de considerase un elementu trescendental pal desarrollu de la nuestra Comunidá y tamien na so proyección esterior.’ Reconociendo que ‘diba ser imposible entender la cultura asturiana ensin l’aportación que se fizo a ella dende l’esterior y, güei, esa aportación sigue siendo indispensable’.Ver video (QuickTime),

Nel actu de clausura d’esta segunda promoción del primer cursu, amás de facese entrega de los diplomes Ver video (QuickTime), alumnos y profesores dieron un conciertu que tuvo compuestu de les siguientes actuaciones:

Les bandes de gaites fixeron una marcha procesional de Belmonte de Miranda. La música de la marcha yera tradicional con igües de Antolín de la Fuente. Y a continuación, tocaron ‘Muñeira de Bual’, tradicional tamien, con igües de Flavio Rodríguez Benito. Colos bailes a lo suelto ‘La Donzaina’ (L.larón – Cangas del Narcea) y la ‘Jota d’un puntu’ (Tineu – Valdes), dióse pasu a la actuación del gaiteru Ramón Sobero Romo, de Mexico, que tocó ‘Si la nieve resbala’.
La siguiente de les apaiciones fue pa cantar les tradicionales ‘La Florentina’ (Inverniegu – Valdes) y el ‘Ramu de Xiyón’ (Cangas del Narcea). Otros de los bailes que se danzaron foron ‘La Saldiguera’ (L.larón – Cangas del Narcea) y la ‘Muñeira nel Occidente’ (Ibias), enantes de l’actuación del gaiteru Víctor Apariocio Sáez, d’Alcobendas, que pertenez al Respingu.
Tres d’el, el conxuntu instrumental interpretó la ‘Muñeira Llibardón’ y l’área vocal fixo lo propio con ‘La neña que ye pa mi’ (Cancionero de Torner) y ‘Mocina, dame un besín’, d’Antolín de la Fuente.
Los componentes del conxuntu Vocal – Instrumental yeren:
Autor: Eduardo Martínez Torner
Armonización: Vicente J. Sánchez García
Tecláu: miriam Diana SAvino Fernández (Mar del Plata – Argentina)
Solista Voz: Diana De Cleene Ruiz (Rosario – Argentina)
Gaites: Flavio Rodríguez Benito y Jose M.Fdez. ‘Guti’
Percusión: Fernando M. de la Puente Hevia, Pedro Pangua Rivas y grupu d’alumnos.
Coru: Grupu d’alumnos
Director: Vicente J. Sánchez García

Como pieslle del actu, tolos asistentes cantaron xuntos l’Asturies, Patria Querida.