Entamó n’Avilés la temporada Seronda-Iviernu de Radiadora

Entamó n’Avilés la temporada Seronda-Iviernu de Radiadora
02 11:23 2021 Imprimir

Esti vienres entamóuna nueva temporada de Radiadora, la de Seronda-Iviernu, el proyectu de radio llibre on line del Serviciu de Mocedá del Conceyu d’Avilés onde los mozos d’Avilés atopen un espaciu para espresar les sos idees, moliciones, aficiones, etcétera.

Un sitiu especial onde poder dexar volar la creatividá en forma de palabres y música. Con esi enfotu, esti proyectu acueye a cualesquier mozu o moza que deseye poner en marcha un programa y que quiera atopar una plataforma onde afigurar aquello que precisa espresar.

Dende l’equipu de Radiadora caltienen que “anguaño, dende finales del mes d’ochobre, dempués d’un paréntesis veraniegu de puesta a puntu, actualización, creatividá, y como non, col cobertor a la cabeza, empezamos a emitir cola ilusión de siempre”. Radiadora va emitise tolos vienres dende l’Edificiu Fueru a les 16:00 hores y va ser en directu al traviés del Facebook “Radiadora Avilés” y de Instagram  radiadoraaviles.

Los programes colos que se cunta, pel momento, esta temporada hasta final d’añu son, Fora d’esti mundu, La farándula, El visillu, Europa Equí, El futuru con Samuel y dalgunos más que se tán cerrando. Les temes trataes nos distintos programes son bien diversos, dende casos misteriosos, cine, temes d’actualidá, feminismu, cultura xaponesa, poesía, moliciones polo xeneral qu’esmolecen a los nuesos mozos.

Dende l’equipu técnicu de Radiadora afirmen que “tamos bien sosprendíos del impactu social que cada vez va n’aumentu ente los nuesos mozos oyentes, implicando a la ciudadanía nueva nes temes d’actualidá de la nuesa ciudá, según a representantes políticos y otros axentes de cambéu n’Avilés como asociaciones, artistes, educadores, personaxes del mundu cultural, etcétera”. Pa siguir faciendo ciudá al traviés de les ondes convidar a cualesquier mozu d’Avilés que quiera participar nesta increíble aventura radiofónica.

  Categories: