Entamó na capital del Estáu la 38 Selmana de les Lletres

Esti xueves 27 d’abril entamaron nel centru Asturianu de Madrid les actividaes de la 38 edición de la Selmana de les Lletres Asturianes que van reconocer la creación lliteraria y musical n’asturianu y gallego-asturianu hasta’l próximu 9 de mayu.

Con un programa d’actividaes que s’amuesa bien completu, la Conseyería d’Educación y Cultura quier homenaxar d’esta vuelta’l papel de les muyeres na lliteratura asturiana y pa ello llevó amás la primer actividá de la programación a la capital del Estáu. El lema Lletres, femenín plural resume la variedá que podemos atopar nes voces de les escritores actuales, ensin escaecer figures que yá se reconocieron en Selmanes anteriores y la Conseyería quiso poner enrriba la mesa esa realidá nel Centru Asturianu de Madrid.

Nel Salón Príncipe d’Asturies d’Asturies del centru Asturianu celebrose esti xueves el Día de les Lletres Asturianes nel esterior cola  presentación del llibru “Escritores asturianes, antoloxía de testos n’asturianu y  gallego-asturianu”. L’actu, entamáu pol Direutor de Política Llingüística Fernando padilla, cuntó cola intervención de les escritores Lurdes Álvarez, Sofía Castañón y Sabela  Fernández.

Tres d’una actuación musical de Anabel Santiago, tuvo llugar tamién una representación teatral del sainete cómico Llíu nel restaurante, de José Ramón Oliva Alonso, por el Grupo de Teatru Señaldá.