Entamó la Selmana Cultural del Julián Orbón

Entamó la Selmana Cultural del Julián Orbón
04 abril 15:33 2022 Imprimir

Entamó la Selmana Cultural del Julián Orbón col conciertu esti viernes d’Ástur Ensemble nel hall del Conservatorio y el domingu, colos baillarinos de Larreal qu’interpretaron nel Teatru Palacio Valdés siete coreografíes sobro les composiciones d’otros tantos conocíos músicos.

Dempués de dos años en blancu pola pandemia esti vienres entamó con un conciertu del Ástur Ensemble la Selmana Cultural del Conservatorio Municipal Profesional Julián Orbón, na so cuarta edición, qu’ufierta a la ciudadanía avilesina un programa bien variáu d’actividaes nos que tien cabida los conciertos, la danza y les charres y conferencies con profesionales de la música y l’escena nes sos distintes variantes. Y lo que ye bien importante, toles actividaes son gratuites.

L’oxetivu principal d’estes xornaes ye faer parte a tola comunidá educativa del Conservatorio Julián Orbón, a los avilesinos y avilesines y al públicu polo xeneral, de la vida artística y musical que surde de l’actividá ordinaria del centru, integrando conciertos de profesores, alumnáu y músicos invitaos, según les charres de prestixosos músicos de distintos ámbitos, y la relación ente la música y otres artes.

Tres de los concieros de la fin de selmana, esti llunes 4 d’abril va tener llugar a les 19:30 hores una conferencia nel Auditoriu de la Casa de Cultura al cargu d’Alejandro Román, compositor y profesor del Real Conservatorio Superior de Música de Madrid, que va falar sobro la Composición Musivisual: técniques y ferramientes tecnolóxiques pa la creación de música aplicada y la so transposición a la música de conciertu”.

El martes 5 d’abril  a les 19:30 hores nel Teatru Palacio Valdés, Rodrigo Cuevas. Cantante y artista multidisciplinar va charrar col públicu asistente. Va Intervenir como moderador el periodista de SER  Avilés Nachu Poncel.

Y el xueves 7 d’abril a les 19.30 hores nel Teatru Palacio Valdés, l’actriz y cantante Leire Martínez, vocalista de la Oreya de Van Gogh, va interactuar col públicu nuna charra modera por Giuseppe Montoto, periodista de la TPA.

Unu de los platos fuertes de la programación ye’l conciertu “Historia d’un soldáu”, de Stravinsky: el miércoles 6 a les 19:30h nel Teatru Palacio Valdés. Tratase d’una obra de cámara escrita primeramente pa trés actores y siete instrumentistes sobro un cuentu popular rusu que cunta l’infortuniu d’un home que viende’l so violín al diañu en cuenta de un llibru col poder de predicir el futuru.

El programa de la IV Selmana Cultural ciérrase’l vienres 8 d’abril col Conciertu de Primavera. (19:30 hores. Auditoriu de la Casa de Cultura) a cargu del alumnáu del Conservatorio Julián Orbón.

Tolos eventos que se realicen na Casa Municipal de Cultura y nel Teatru Palacio Valdés son con entrada gratuita hasta completar aforu, previa retirada d’invitaciones na taquilla de la Casa Municipal de Cultura.

Programa completu

Vienres 1 d’abril. Hall del Conservatorio, 20.00 hores. Conciertu del Ástur Ensemble, con obres de Mozart, Debussy y Dvorak.

Domingo 3 d’abril. Teatru Palaciu Valdés, 19.30 hores. Danza clásica y española, cola compañía Larreal.

Llunes 4 d’abril. Auditoriu de la Casa de Cultura, 19.30 hores. Conferencia d’Alejandro Román.

Martes 5 d’abril. Teatru Palaciu Valdés, 19.30 hores. Charra de Rodrigo Cueves, col periodista Nachu Poncela.

Miércoles 6 d’abril. Teatru Palaciu Valdés, 19.30 hores. Conciertu “Historia d’un soldáu”, de Stravinsky.

Xueves 7 d’abril. Teatru Palaciu Valdés, 19.30 hores. Charra de Leire Martínez, col periodista Giuseppe Montoto.

Vienres 8 d’abril. Auditoriu de la Casa de Cultura, 19.30 hores. Conciertu de Primavera del alumnáu del Conservatorio Julián Orbón.

  Categories:
Loading Facebook Comments ...