Entamen les XXXVII Xornaes Internacionales d’Estudiu de l’ALLA

Esti martes, 5 de payares, a les 12 hores na Facultá de Filosofía y Lletres de la Universidá d’Uviéu tendrá llugar la inauguración de les XXXVII Xornaes Internacionales d’Estudiu que se van desenvolver hasta’l día 7 con comunicaciones y ponencies estremaes sobre la situación del asturianu y la investigación alrodiu de la llingua.

Les Xornaes celebraránse los díes 5, 6 y 7 de payares y nelles participarán un bon númberu de profesores ya investigadores asturianos xunto con otros de distintes universidaes españoles y estranxeres. La sesión entamará cola intervención de les autoridaes académiques y el Presidente de l’Academia de la Llingua Asturiana, D. Xosé Antón González Riaño pa dar pasu a les presentaciones de la edición dixital del númberu de la revista Lletres Asturianes y d’un nuevu númberu de la revista Ciencies. Cartafueyos Asturianos de Ciencia y Teunoloxía.

La conferencia inaugural tará esti añu a cargu del director de cine Ramón Lluis Bande que va ufiertar una ponencia sobro les posibilidaes futures del cine asturianu. Nesa mesma xornada, el profesor de la Universidá de Zamora, Philipp Obrist, va falar sobro’l mitu de les llingües medievales y la contraargumentación n’asturianolleonés y la profesora de la Universidá d’Uviéu, María Olga Álvarez Güerta, va analizar la primer traducción del llatín al asturianu. Na xornada primera tamién va haber comunicaciones sobro l’aniversariu d’Amigos del Bable, la toponimia d’Asturies en llingua de signos, la enseñanza virtual del asturianu y l’hestoria del himnu d’Asturies.

El miércoles, el profesor de la Universidá de la Florida Imanol Suárez Palma va falar sobro la posesión inalienable nes construcciones medies del castellán y l’asturianu, mentantu que la profesora de la Universidá de la llaguna Josefa Dorta Luis va tratar les relaciones ente l’asturianu y el dialectu canariu. Pa rematar les potencies d’esta segunda xornada, el profesor de la Universidá de Torino Antonio Romanu va falar de la prosodia asturiana, una tema que va ocupar delles comunicaciones demientres esti día.

Pa finar les Xornaes, el xueves, la profesora de la Universidá de Toulouse, Lucia Molinu, va tratar de los préstamos n’asturianu, ente que’l profesor de la Universidá de Barcelona, José Enrique Gargallo Gil, va falar de los refranes meteorolóxicos. Nesa última xornada tamién se va falar de la imaxe social del asturianu, la lliteratura oral de Senabria y la documentación nel Hospiciu d’Uviéu.

El programa completu de les Xornaes pue descargase dende equí.