Entamen les obres nel Teatru Palacio Valdés d’Avilés

Entamen les obres nel Teatru Palacio Valdés d’Avilés
04 mayu 16:42 2017 Imprimir

Coincidiendo col 25 aniversariu del coliséu avilesín, el Conceyu va empecipiar obres de caltenimientu, caltenimientu y afitamientu na decoración de la sala principal del Teatru Palacio Valdés, con un presupuestu de 151.836 €.

Les actuaciones previstes van ameyorar l’aspeutu del coliséu, van realzar la so rellumanza y van desaniciar la gastadura propia de los 25 años trescurríos dende’l so reinauguración en 1992. Les obres van licitase nos próximos díes y la previsión ye qu’entamen a finales de xunu, con un períodu d’execución de 3 meses mientres los cualos el teatru va permanecer inevitablemente zarráu.

L’alcaldesa d’Avilés, Mariví Monteserín, anunció esta selmana que la conceyalía de Cultura prepara una programación especial pal últimu trimestre del añu conmemorativa de les bodes de plata del Palaciu Valdés. Monteserín recordó qu’a lo llargo d’estos 25 años, el teatru “foi oxetu de continues actuaciones de caltenimientu y meyora per parte del Conceyu y la renovación de la sala agora proxectada va dexanos realzar non yá la función teatral del teatru, sinón el so induldable valor como referente del patrimoniu artísticu de la ciudá”.

El coliséu avilesín ye un edificiu catalogáu como Bien d’Interés Cultural con categoría de monumentu -polo que tien protección estatal y autonómica-. Les meyores van consistir na rehabilitación de los acabaos de pintura de la sala principal del teatru (interior y esterior de los palcos y restauración de les zones estropiaes en cúpula, columnes y elementos decorativos)  y na implementación del so llume al traviés de luminaria tipo led pa realzar dellos elementos decorativos de la sala.

La pintura va tomar tol interior del patiu de butaques. va incluyise la pintura interior y esterior de los palcos,  a base d’esmaltes, y la llimpieza a mano de los elementos pintaos al oliu y el so arreglu. Tocantes a los doraos, van aplicase esmaltes metalizados ellaboraos con resines acríliques y polvu mineral, siempres con materiales de primera calidá más estables.

L’arreglu de les zones estropiaes na cúpula va facese por aciu saneamientu del soporte d’escayola y la posterior restauración de la pintura decorativa. Siempres artesanalmente y cola mesma técnica emplegada originalmente por un oficial espertu acreditáu nesti tipu de trabayos. Pa la execución de les obres ye necesario instalar un andamiu que circunscribirá la contorna de la sala hasta’l techu, pa lo que tendrá de ser reforzáu cola apuntaladura del forxáu del patiu de butaques, según el desmontaje de les mesmes y de la llámpara central.

  Categories: