Entamen les IV Xornaes de Patrimoniu Cultural d’Uviéu

Entamen les IV Xornaes de Patrimoniu Cultural d’Uviéu
12 09:58 2018 Imprimir

Visites a la Fábrica d’Armes de La Vega, un percorríu por Trubia, alderiques y charres, componen el programa de les IV Xornaes de Patrimoniu Cultural d’Uviéu que van desenvolvese dende esti llunes 12 al 17 de payares, y que foron presentaes la selmana pasada pol presidente de la Fundación Municipal de Cultura, el conceyal Roberto Sánchez Ramos y el coordinador, Toño Güerta.

El conceyal de Cultura, Roberto Sánchez Ramos, presentó en rueda de la prensa les IV Xornaes de Patrimoniu Cultural d’Uviéu al pie del so coordinador, Toño Güerta “un gran exemplu d’amor al so trabayu”.

Col enfotu de que “estes xornaes sigan en próximes ediciones” el conceyal detalló que se van celebrar, del 12 al 17 de payares “nel Palaciu de Congresos (PEC) y en dellos allugamientos del conceyu. Empezaron en 2015 en Trubia, con un títulu bien suxerente, ‘Un patrimoniu ferruñosu?’ y mientres estes ediciones hubo un intentu y creo, modestamente, que se llogró poner en valor la riqueza del nuesu patrimoniu industrial. Uviéu puede ser para munchos una ciudá de servicios pero tien una hestoria oculta, ye una ciudá industrial que llegó a tener nel sieglu XVIII y XIX más industries que niundes d’Asturies. Nel nuesu conceyu empezó tou. L’añu que vien la Fábrica d’armes de Trubia va cumplir 225 años. Equí empezó la hestoria de la industria d’Asturies… más La Vega, la minería… conformen la hestoria d’Uviéu”, esplicó Sánchez Ramos.

Estes xornaes, na so opinión, “apurrieron conocencia sobro esa hestoria oculta. De resultes d’esa actividá la hestoria industrial d’Asturies escribiérase a partir de los 225 años de la Fábrica de Trubia o los 156 años de La Vega, cerrada en 2012-2013 y con que los sos terrenales y el so patrimoniu intentóse especular”. La estratexa d’estes IV Xornaes, indicó’l conceyal, “yera abrir La Vega a la población, que la xente conoza’l valor cultural, arqueolóxicu ya industrial d’estos terrenes por que la xente defenda esa realidá. En 2015 yera xuna ilusión; Güei va ser xuna certidume, los terrenes van  pasar a los intereses públicos de la ciudadanía. Gracies a Güerta y a tolos que fixeron posible estes xornaes porque güei nun hai naide n’Uviéu, Asturies nin en Madrid que tenga la valentía de dicir qu’en La Vega hai que construyir un llugar públicu”.

Toño Güerta desglosó’l programa y apuntó que la idega ye que “tolos díes, sacantes unu, va haber una ponencia y una mesa d’alderique y visites”. Toles ponencies y meses d’alderique van celebrase nes sales 10 y 11 del PEC, con accesu llibre hasta completar aforu. Les visites a La Vega van facer por aciu inscripción previa nesti enllaz https://www.oviedo.es/jornadaspatrimoniocultural, apurriendo nome, apellíos, númberu de DNI, corréu electrónicu y día de la visita de cada persona comenenciuda n’aportar. Y remató la so intervención estimando “el llabor de la Fundación Municipal de Cultura” y deseyando que “pal añu que vien haya unes quintes”.

  Categories: