Entamen les inscripciones pa los talleres de branu de Xixón

Esti llunes 22 entamó’l plazu pa inscribise nos talleres pa neñes y neños n’asturianu pa esti branu que como tolos años tan organizaos pola Oficina de normalización Llingüística, dientro la programación xeneral del Ayuntamientu de Xixón. Dibuxu de cómic, baille o manualidaes son delles de les temes d’estos talleres.

Estos son los talleres qu’ufierten dende la Oficina de Normalización Llingüística de Xixón pa estos meses:

– Dibuxando les maraviyes de Xixón. Taller de cómic con Ruma Barbero” (de 6 a 12 años) :

Ruma Barbero pon esti mini-taller de cómic n’asturianu, centráu en “Les 7 maraviyes de Xixón”, qu’amuesa al traviés de personaxes de la mitoloxía asturiana los siete recursos

turísticos más destacaos de Xixón, como l’acuariu, les playes, el parque Isabel la Católica, la Llaboral, el Xardín Botánicu y

Cimavilla.

20 a 31 de xunetu nel CCAI.

-“Baille embruxáu”(de 4 a 6 años):

Una neña con muncha gana de saber, un ser mitolóxicu, un conxuru y unos cuantos animales baillarinos. ¿Desfacemos l’encantamientu?

Nesti taller xúntense la danza y los cuentos p’averar a lo más pequeñino (de 4 a 6 años) al folclor asturianu al traviés d’una historia cola qu’amás d’aprender bailles y cantares, van conocer vocabulariu venceyáu cola cultura tradicional asturiana.

7 a 10 d’agostu nel Tendayu del Muséu del Pueblu d’Asturies

– “Ponte la mázcara” (de 5 a 8 años):

Con esta actividá avérase a les neñes y neños a la mitoloxía asturiana: recorten, coloreen y decoren la mázcara del personaxe mitolóxicu que más-yos preste. En ‘convirtiéndose’ en seres mitolóxicos van representar una historia curtia cola que van echar a andar el maxín y meyorar la so creatividá.

10 a 14 d’agostu nel CCAI.

-“Vistiéndonos como antaño” (de 6 a 12 años):

La vistimenta tradicional reflexa una dómina concreta d’Asturies, de les asturianes y de los asturianos: diznos muncho de les sos creencies, oficios, ritos, fiestes, etc.

Con esta actividá práutica les neñes y neños van esperimentar coles materies primes y van ver les pieces de la indumentaria tradicional asturiana al tiempu que visten el so recortable propiu.

13 a 17 de xunetu nel CCAI.

–> El plazu p’apuntase entama’l llunes a les 8.30 hores.

La información pue ampliase nel catálogu xeneral d’actividaes del Ayuntamientu pal branu.