Abren les inscripciones pa escoyer Xana, Xanina y Dames d’Honor d’El Bollu

Abren les inscripciones pa escoyer Xana, Xanina y Dames d’Honor d’El Bollu
18 marzu 09:58 2019 Imprimir

Nos próximos díes van anunciase los plazos y el procedimientu pa inscribise na Comida na Cai de les fiestes d’El Bollu n’Avilés, les inscripciones pa escoyer la Xana, Xanina y les Dames d’Honor dende esti llunes 18 de marzu. El sortéu ente les candidates va ser el sábadu 6 d’abril y la gala de presentación va celebrase’l sábadu 13 d’abril nel Teatru Palacio Valdés.

La Conceyalía de Festexos abre esti llunes 18 de marzu’l plazu de presentación de candidatures a Xana, Xanina y Dames d’Honor de les Fiestes d’El Bollu 2019. Van Poder presentase hasta’l vienres 5 d’abril nes dependencies de la Delegación Municipal de Festexos (C/Ruiz Gómez, 21. Oficina Municipal de Turismu d’Avilés), n’horariu de 9 a 15 hores.

La elección de les afortunaes va tener llugar el sábadu 6 d’abril, a les 12 hores, nun sortéu que va tener llugar na Casa Municipal de Cultura (plaza d’Álvarez Acebal, 2). Toles candidates van tener que tar presentes inexcusablemente el día de la elección. En casu contrariu van quedar escluyíes del sortéu.

La edá de les candidates a Xana y Xanina queda establecida de la siguiente manera:

Xana y Dames d’Honor: 15 a 20 años cumplíos
Xanina y Dames d’Honor: 8 a 12 años cumplíos

Les asociaciones de vecinos o entidaes culturales que lo deseyen van poder presentar cuantes candidates consideren, ensin necesidá de selección previa. Asina mesmu, caltiense abierta la inscripción llibre pa cualquier moza o neña que cumpla colos requisitos d’edá enantes descritos.

Nun van poder volver presentase les neñes y moces que fueren escoyíes Xana o Xanina nos postreros dos años. Sicasí, les Dames d’Honor sí van poder volver presentase pa optar a ser Xana o Xanina.

La gala de presentación de la Xana, Xanina y Dames d’Honor de les Fiestes d’El Bollu 2019 va tener llugar el sábadu 13 d’abril nel Teatru Palacio Valdés. Per otru llau, nos próximos díes van anunciase los plazos y el procedimientu pa inscribise na Comida na Cai.

  Categories: