Entama’l X Festival de la Gaita de Villaviciosa

Entama’l X Festival de la Gaita de Villaviciosa
31 agostu 17:00 2015 Imprimir

Ente’l 3 y el 6 de septiembre Villaviciosa va acoyer la décima edición del Festival Internacional de la Gaita qu’entama la Banda de Gaites Villaviciosa “El  Gaiteru” y qu’axunta nel programa d’esti añu ocho bandes de gaites, espectáculos de lluz y soníu cola gaita como protagonista, una nueche de danza, el mercáu d’artesanía, l’alcuentru de Luthiers, recitales poéticos y conciertos folk, delles masterclass, y l’hermanamientu ente festivales y concursu  de gaiteros solistes.

El Festival va tar acompañao nesta ocasión por  otres dos actividaes bien populares: “Les Tables Gaiteres” al traviés de les qu’Acosevi collabora cola parte gastronómica y la sidra de la XVIII Fiesta de la Sidra, que van ser namái que dos de los munchos ingredientes d’un llargu fin de selmana dedicáu a la gaita en Villaviciosa.

De vienres a domingu’l Parque del Pelambre va ser el llugar onde se desenvuelva como otros años el Mercáu d’Artesanía, amás de la Nueche en Danza que va cuntar esti año cola presencia de Tuenda na nueche del vienres, l’alcuentru de Luthiers demientres tol sábadu, el Festival de Bandes na tarde del sábadu y la Nueche Folk na que van actuar Sylvain Barou Tríu, Corquiéu y Skama La Rede a partir de les once y media de la nueche del sábadu.

Otros escenarios del FIG van ser la Fundación Cardín, onde la tarde del vienres el flauteru bretón Sylvin Barou va impartir una masterclass, el Teatru Riera onde va tener llugar na tarde del domingu la quinta edición del Concursu de Gaiteros Solistes “Memorial José Güerta” y la Plaza del Conceyu onde la Fiesta de la Sidra y el Concursu d’Escanciadores que se van celebrar a lo llargo del sábadu cinco van enxareyar col recital poéticu de Fame Poétika y coles actuaciones de les bandes participantes, El Trubiecu de Villaviciosa, la Banduca El Tingláu de Cantabria, Zarréu de Degaña, LaKadarma de Nava, Conceyu de Langréu, Castro Bergidum de Ponferrada, Camín de Fierro de Proaza y la mesma Banda de Gaites Villaviciosa “El Gaiteru”. L’entamu de la Fiesta de la Sidra va ser amás el momentu de hermanamiento ente’l FIG y el Festival Folkcomillas que se celebra en Cantabria.

Tola información sobre’l festival podrá llograse al traviés de la web municipal, la propia web del Festival y el Facebook del Festival Internacional de la Gaita.

Loading Facebook Comments ...