Entama’l plan de prevención d’agresiones sexistes nos institutos d’Avilés

by asturnet | febrero 6, 2018 10:02 am

Concenciar sobro la importancia de nun cometer nin tolerar agresiones sexistes n’espacios d’ociu y tiempu llibre ye’l principal oxetivu d’esti programa de prevención de la Conceyalía de Mocedá que dende esta selmana van llevar a cabu los mozos del proxecto Antenes Informatives nos cinco Institutos públicos d’Educación de Secundaria d’Avilés.

«El potencial d’esti proyectu basase n’establecer una comunicación de ‘tu a tu’, ente iguales, que facilite a los mozos abrir y treslladar les sos esmoliciones o esperiencies no relativo a les agresiones sexistes», según desplicó esti día la conceyala de Mocedá d’Avilés, Raquel Ruiz. Pa ello, mientres un recréu a la selmana, los mozos y moces de les Antenes Informatives van ufiertar información a los sos compañeros sobro les agresiones sexistes y van asitiar un Puntu Moráu’ o buzón nel que se van recoyer de manera anónima les duldes y suxerencies que sobro esta tema o de cualesquier otru que los provoque incomodidades nos sos espacios d’ociu. «Toles consultes van ser anónimes y van respondese darréu al traviés de Facebook del proyectu Bárbara», esplica Raquel Ruiz.

Los miembros de les Antenes Informatives recibieron formación sobro’l conceutu y contestos de les agresiones sexistes que-yos va dexar tanto informar a los sos compañeros como reaccionar en casu de detectar un problema d’esti ámbitu. «Ye habitual atopate con comentarios y conductes sexistes nel institutu, pero creo que la situación ta meyor agora qu’en dómines anteriores», señala Enol Pérez, integrante de les Antenes Informatives.

Esti programa entama güei martes, a partir de les 12.20, nel Institutu de la Madalena y va enllargase mientres tol cursu escolar. Mañana va presentase nel Institutu Menéndez Pidal. El xueves va facese nel institutu de La Lluz. El vienres va realizase la presentación nel Nº 5 y el llunes 12, nel Carreño Miranda. Pa presentar la iniciativa a la totalidá del alumnáu de cada centru, el primer día va realizase un photocall y repartida de tarxetes col ánimu de convidar a los mozos a participar.

Source URL: http://asturnews.com/entamal-plan-de-prevencion-dagresiones-sexistes-nos-institutos-daviles/