Entama’l Festival Arcu Atlánticu 2015 na Plaza Mayor

Entama’l Festival Arcu Atlánticu 2015 na Plaza Mayor
24 xunetu 15:27 2015 Imprimir

Esti vienres 24 de xunetu, entama la cuarta edición del Festival Arcu Atlánticu en Xixón, que va tener ente les ciudaes convidaes d’Europa, la francesa de Le Mans y les portugueses de Nazaré, Guimaraes, Braga y Mira, a los conceyos de Cabrales, Cangues d’Onís y Ribesella. Esta cita va ufiertar un añu más una amplia ufierta cultural y gastronómica rellacionada col folclore y les tradiciones de cada ciudá atlántica participante.

Les actividaes entamen esti día a les ocho y media na Plaza Mayor cola actuación de la Big Band del Conservatoriu y Coru femenín Aurum del León de Oro de Lluancu y a les diez de la nueche cola Dominic Graham School of Irish Dance.

La redolada del Puertu Deportivu va convertise demientres nueve díes -del 24 de xunetu al 2 d’agostu- nel epicentru d’estes actividaes, con conciertos, danza, teatru, xuegos tradicionales, lliteratura, gastronomía, cine, esposiciones, conferencies y conxustes, amás d’amueses d’oficios tradicionales. Tamién ta preparáu un programa especial destináu pa los más pequenos, llamáu Arcu infantil, que va cuntar con manualidades y talleres.

Top eso ensin escaecer que’l programa va complementase con actividaes rellacionaes en diversos museos de la ciudá, nel Centru de Cultura Antiguu Institutu y nel Xardín Botánicu, nel que se van llevar a cabo rutes empuestes.

Ente les actividaes gastronómiques, entamaes dende la área de Turismu Divertia, atópase l’III salón de agroalimentación y turismu, unu de los eventos, más importantes, porque dexa establecer alcuerdos comerciales ente productores asturianos y distribuidores de too l’ámbitu xeográficu del Arcu Atlánticu. Nel marcu gastronómicu tamién s’inclúi Arcochef 2015, un concursu pa los aficionaos amateur a los fogones que les sos fases eliminatories empezaron yá’l pasáu día 5.

Nel apartáu cultural, la variedá va ser la nota dominante. No qu’a música se refier, el conciertu inaugural del próximu vienres va correr al cargu de la Big Band del Conservatorio de Música de Xixón y el coru femenín Aurum de Lluanco. A lo llargo de los díes posteriores van actuar, ente otros munchos grupos, Folk On Crest, La M.O.D.A. y l’Orquesta Céltica Asturiana. Tamién ta programáu un mercáu ástur-romanu y una mazcarada ibérica.

Les ciudaes atlántiques invitaes nesta edición son la francesa de Le Mans y les portugueses de Nazaré, Guimaraes, Braga y Mira, caúna d’elles coles sos peculiaridaes y tradiciones.

Más información: Programación del Festival Arcu Atánticu 2015

  Categories:
Loading Facebook Comments ...