Entama’l cursu esin convocase les beques Severu Ochoa

Entama’l cursu esin convocase les beques Severu Ochoa
24 setiembre 10:36 2018 Imprimir

L’Asamblea pol Futuru de la Investigación en Asturies (AFIA) vieno acabante denunciar qu’un añu más, la comunidá investigadora predoctoral n’Asturies empieza’l cursu académicu ensin saber si va cuntar o non col financiamientu que solicitó pal pasáu cursu 2017-2018.

Dende la publicación el pasáu 31 de xunetu de la propuesta de resolvimientu provisional y l’apertura del consiguiente periodu d’allegamientos, éstes caltiénense en periodu d’evaluación, desconociéndose la fecha prevista para la publicación del resolvimientu definitivu. Esto caltién a los candidatos ensin saber si van cuntar o non col financiamientu solicitáu y, en munchos casos, oblíga-yos a matriculase d’un nuevu cursu nesa situación d’incertidume. Ello ye que a pesar de les promeses del rectoráu, nun se flexibilizó’l periodu de matrícula nel Programa de Doctoráu, rematando’l pasáu 7 de setiembre.

La convocatoria de contratos predoctorales Severu Ochoa 2017 atropa un retrasu inclusive mayor que l’anterior de 2016, que los sos beneficiarios roblaron los sos contratos en xunu de 2017 a pesar de que tamién s’allargaron los plazos más de lo previsto. Esti retrasu foi debíu, según la Dirección Xeneral d’Universidaes, dependiente de la Conseyería d’Educación, a restricciones presupuestaries que torgaron que s’empecipiaren los trámites d’evaluación hasta seis meses dempués de que les solicitúes fueron realizaes.

L’Asamblea pol Futuru de la Investigación en Asturies (AFIA) diz nuna nota de prensa asoleyada esta fin de selmana que va siguir reivindicando les precaries condiciones de los distintos colectivos investigadores asturianos, sofitando la concentración de colectivos investigadores que se va celebrar güei nel actu d’apertura del cursu académicu.

  Categories:
Loading Facebook Comments ...