Entama’l Ciclu de llectures dramatizaes: Mirando al tendíu

El Ciclu de llectures dramatizaes: “Mirando al tendíu” que va desenvolvese esti mes nel Centru de Cultura Antiguu Institutu, entama nel so Salón d’actos, esti vienres 13 de febreru a les 20 hores. Con Mirando al tendíu sigue’l ciclu de llectures dramatizaes que pretende dar a conocer la cultura teatral por aciu la llectura d’obres representatives de la lliteratura universal.

El ciclu, dirixíu por Felipe Ruiz de Lara y, nesta ocasión, interpretáu polos actores Juan Carlos Martínez y Jorge Fandos, tien como fin collaborar cola Fundación Bancu d’Alimentos d’Asturies.

La entrada al actu ye por ello en cuenta de alimentos.

Rodolfo Santana (Caracas, 1944-2012) foi dramaturgu, guionista de cine y director de teatru. Les sos obres fueron traducíes a dellos idiomes y representaes en Llatinoamérica y Europa. Mirando al tendíu que propón una reflexón sobre la vida y la muerte, utilizando como metáfora una corrida de toros na qu’un toru y un toreru falen sobre la so posición ante los dos situaciones.

Felipe Ruiz de Lara, actor madrilanu que llegó a Xixón nos años 80 en Xixón, pa incorporase en 1982 a la acabante crear una Universidá Popular. Dende les sos clases de teatru na UP xenerose un pebidal de vocaciones que foron fructificando en delles compañíes de teatru surdíes de les sos files y nun bon númberu de profesionales venceyaos a les artes escéniques.

El primer grupu teatral que Felipe formó a partir de los talleres de la UP foi La Galerna, entá n’activu, y pol que pasaron numberoses cares conocíes del teatru asturianu. Dempués vendría Zarabanda, tamién dirixíu por Felipe y Marián. Yá en solitariu, dirixiría La Peseta, Infinitu Teatru y Atrebil, en collaboración cola so fía Idoia. Y a lo último, en 2011 surde Irónicu Teatru. La conocencia ya interés de Felipe por autores contemporaneos y dramaturxes minoritaries, fíxo-y optar por testos de Valle-Inclán, Ionesco, Ribemont-Dessaignes, Aristófanes, Goldoni, Lorca, Edward Bond, Sanchis Sinisterra, Sarah Kane, Maeterlinck y Laurent Gaudé. Trabayador incansable, íntegru y perfeccionista, agora va dedicase a tiempu completu a la dirección y la interpretación en cine y series de TV, nes que yá lleva participando dende 2008, como n’Aída, Águila Roja, Cuéntame, Amar en tiempos revueltos y El secreto de Puente Viejo.