Entama’l Club de Llectura d’Uniovi

Entama’l Club de Llectura d’Uniovi
30 setiembre 15:39 2015 Imprimir

Esti xueves primeru d’ochobre a les 17,15 hores entama na Sala de revistes de la Biblioteca de Tecnoloxía y Empresa (BTE) del Campus de la Universidá d’Uviéu en Xixón,  la primer actividá d’esti proyectu que ye’l CLub de Llectura universitariu.

El proyectu quier dinamizar la vida cultural del Campus de Xixón y va tar abiertu a tola comunidá universitaria (alumnáu, profesoráu, PDI, y personal d’alministración de servicios, PAS) y, si queden places, al públicu polo xeneral. En realidá yá lleva un par de selmanes funcionando  al traviés del e-mail y del Facebook CampusGijonLlee. Tola xente que quixeron tán lleendo’l primer testu propuestu que ye “Hestories sentíes” de César Alonso, profesor d’esti Campus.

Nesta ocasión la primer Actividá y la primer Xunta de llectores faise coincidir pos al tener cercanu al autor, va aprovechase pa faer una presentación de la obra con posibilidá de compra y firma in situ del exemplar, “alvirtiendo al alumnáu qu’esta compra nun garantiza l’aprobáu con esti profesor anque seique xuba daqué la estima” como espeyen con sorna na nota de prensa los responsables del Club de Llectura.

Va haber por tanto una presentación orixinal con llectura de dellos relatos, de siguío robla d’exemplares y depués los comentarios del Club sobre’l testu lleíu abiertu a quien quiera. Y va aprovechase p’apurrir a estos primeros llectores un marcapáxines que va ser, d’equí p’arriba, yá habitual con cada llectura. D’últimes va apurrise el siguiente testu propuestu y va afitase la próxima xunta. Naturalmente siempres en contactu al traviés del *email y Facebook que veis a la fin del *marcapáginas.

Loading Facebook Comments ...