Entama otra vuelta “Escenines”, el festival navidiegu d’artes escéniques n’asturianu

Esta selmana llega un añu más “Escenines” el festival navidiegu d’artes escéniques n’asturianu pa neños y neñes. El festival, qu’algama  la so sesta edición, ta entamáu pola asociación Reciella (families pol asturianu) ya inclúi teatru, títeres, conciertos y cuentacuentos que van desenvolvese nel Centru de Cultura Antiguu Institutu de Xixón con entrada gratuita del miércoles 26 al sábadu 29 d’avientu.

L’asociación “Reciella (families pol asturianu)”, entama un añu más el ciclu d’artes escéniques n’asturianu pa neños y neñes, Escenines, que se celebra en feches navidiegues de forma ininterrumpida dende l’añu 2013 y que cunta col sofitu de la Fundación Municipal de Cultura.

Toles representaciones van tener llugar nel Salón d’Actos del Centru de Cultura Antiguu Institutu (CCAI) de Xixón a les 19.00 hores de la tarde, y l’entrada ye gratuita hasta completar aforu.

Dende la organización destácase la calidá y la variedá del ciclu de 2018 nel que s’inclúin teatru, cuentacuentos, títeres y conciertos, y encamiéntase allegar con tiempu a les representaciones yá que l’añu pasáu completóse l’aforu en toes elles.

MIÉRCOLES 26 D’AVIENTU

“Cuentos a la lluz d’un candil”  d’Olga Cuervo

Cuentos pa neños, cuentos pa neñes. Cuentos pal frío, y pa les estrelles. Cuentos pa contar, cuentos pa escuchar. Cuentos pa baillar y tamién pa cantar.

XUEVES 27 D’AVIENTU

“Azul y la revolución de los colores” de Mar Rojo Teatro

Espectáculu de teatru y títeres que fala d’unes formigues que van vestíes de blancu y prietu.

VIENRES 28 D’AVIENTU

“El Principín”  d’Higiénico Papel Teatro

Adaptación teatral de la famosa obra d’Antoine de Saint-Exupéry protagonizada por un Principín señaldosu y amable que cuenta la so historia nun tonu adaptáu pa lo pequeño de la casa.

SÁBADU 29 D’AVIENTU

“Cantares navidiegos pa neños y neñes” por Bandina de músicos asturianos

Una bandina formada por dalgunos de los nuestros meyores músicos tradicionales van poner nel escenariu una recopilación de cantares navidiegos, tanto los que correspuenden al cancioneru tradicional, como los nuevos compuestos a propósitu de los personaxes del Anguleru o’l Nataliegu.