Entama la contratación de les primeres acciones del proyectu de turismu idiomáticu d’Avilés

El Conseyu d’Alministración de la Sociedá de Desenvolvimientu La Curtidora empecipió na so xunta de güei la contratación de les primeres acciones del proyectu de turismu idiomáticu d’Avilés, “Avilés Enseña”. Concretamente, fueron aprobaos tantu los pliegos pa la contratación d’una asistencia técnica para desenvolvimientu del productu turísticu, como la dotación presupuestaria necesaria pal mesmu demientres los dos próximos exercicios.

“Hasta agora viénose realizando un trabayu d’analís y estudiu de les estratexes de marketing y comercialización, que se resume nel informe executivu presentáu pola asistencia técnica”, esplicó’l conceyal de Desenvolvimientu Urbanu y Promoción de Ciudá, Manuel Riola. Esti documentu, ellaboráu por Beatriz Álvarez, foi facilitáu esta mañana a los miembros del Conseyu.

Dichu informe establez les actuaciones necesaries pal desenvolvimientu del productu de turismu idiomáticu, como’l diseñu de la identidá corporativa, la realización de la páxina web, l’allugamientu en buscadores, la ellaboración de materiales gráficos, viaxes promocionales y una primer acción piloto, ente otres.

Pa la materialización d’estes acciones, el Conseyu d’Alministración de la Sociedá de Desenvolvimientu La Curtidora aprobó una aplicación presupuestaria de 70.000 €, que va sirvir pa financiar los siguientes trabayos ente marzu y avientu de 2020:

• Asistencia técnica: 30.008 € pal desenvolvimientu, por aciu actuaciones concretes, de les acciones indicaes nel informe ellaboráu pa la puesta en marcha del productu turísticu.ç
• Promoción y xestión: 31.492 € pal desenvolvimientu de la imaxe corporativa, páxina web, material gráfico, viaxes promocionales, etc.
• Sofito alministrativu: 8.500 euros pal sofitu a l’asistencia técnica por aciu la contratación d’un auxiliar alministrativu a media xornada.
• Otros 70.000 € van financiar nel exerciciu 2021 les acciones correspondientes al periodu entendíu ente xineru y ochobre de dichu añu, conseñando 30.008 € a l’asistencia técnica, 30.892 € a los llabores de promoción y xestión, y 9.100 € al sofitu alministrativu.

Más información