Portada Comunicación Entama la 43 Selmana de les Lletres Asturianes

Entama la 43 Selmana de les Lletres Asturianes

by redacción asturnews

Esti martes entamen los actos de la 43 Selmana de les Lletres Asturianes que va homenaxar al músicu y dibuxante de cómic Ígor Medio, que cumpliría 50 años nesti 2022. La Selmana de les Lletres va celebrase ente’l 3 y el 6 de mayu, día nel que se celebren los actos institucionales del Día de les Lletres.

La programación d’esta 43 Selmana de les Lletres Asturianes incluye una esposición que se va abrir esti martes y que va tar centrada na obra gráfica del artista xixonés, la presentación d’un documental y un llibru sobre la so trayectoria, y la celebración d’un gran conciertu-homenaxe. Va ser la primer vez qu’una persona nacida na década de los setenta del sieglu pasáu reciba l’homenaxe de les Lletres Asturianes.

La presentación del llibru conmemorativu Ígor Medio. El carbón y l’arena va abrir los actos de la programación. La publicación axunta nueve artículos qu’analicen l’heriedu d’esti creador ya incluye bien de testimonios gráficos de la so vida y obra.

Esti martes 3 de mayu a les 18 hores va inaugurase nel Muséu Barjola la esposición Xente llano de Xixón. La obra gráfica d’Ígor Medio. Depués del actu inaugural va celebrase una jam session, cola participación d’Alberto Ablanedo, Rubén Bada, Pepín de Muñalén y Dolfu R. Fernández. La esposición va tar abierta hasta el vienres 3 de xun

Ruma Barbero, cofundador xunto a Ígor Medio del grupu Felpeyu, y Norman Fernández Tascón, autor de delles monografíes y artículos sobre’l cómic, collaboraron nel diseñu del programa d’actividaes. La proyección del documental Onde soi quien quiero ser. Una semblanza d’Ígor Medio y la celebración d’un gran conciertu-homenaxe onde van participar más de dos decenes de músicos y bandes asturianes completen l’homenaxe que la 43 Selmana de les Lletres rinde a Ígor Medio.

El programa d’actos incluye amás la celebración d’un conciertu de la Orquesta Sinfónica del Principáu d’Asturies,  cola batuta del maestru avilesín Daniel Sánchez Velasco, pa estrenar el so Concierto para violín y orquesta nel Auditoriu Príncipe Felipe d’Uviéu.

Por cuenta de la 43 Selmana de les Lletres Asturianes, la Conseyería de Cultura, Política Llingüística y Turismu edita tamién el llibru Contos eonaviegos, una escoyeta de 28 rellatos d’otros tantos autores publicada pa la ocasión. Les dos obres van ponese gratuitamente a disposición de les persones que merquen un llibru o un discu n’asturianu o n’eonaviegu el vienres 6 de mayu, Día de les Lletres Asturianes. Un total de 57 llibreríes y tiendes de discos del Principáu d’Asturies collaboren anguaño cola Dirección Xeneral de Política Llingüística na promoción y celebración de les Lletres.

Tamién te podria gustar