Enrique Uría espón “Con_SecuencieS” na Factoría Cultural d’Avilés

Enrique Uría espón “Con_SecuencieS” na Factoría Cultural d’Avilés
24 abril 08:56 2018 Imprimir

Enrique Uría espón “Con_SecuencieS” na Factoría Cultural d’Avilés hasta’l 9 de mayu. Apareyador y pintor afincáu en Salinas y alumnu de la Factoría, amuesa un trabayu que supón una evolución dende lo figurativo a lo astracto, y dende l’acuarela y l’oliu, al acrílicu y al grabáu.

Sol títulu “Con_Secuencies”, l’apareyador y pintor de Salinas Enrique Uría, alumnu de la mesma de la Factoría, presenta la evolución del so trabayu artísticu, de lo figurativo a lo astracto, dende l’acuarela y l’oliu, al acrílicu y al grabáu. La so obra va tar espuesta hasta’l 9 de mayu y podrá visitase nos horarios d’apertura del centru de l’avenida de Portugal, de llunes a vienres, de 09.00 a 14.30 hores y de 16.30 a 21.00 hores.

Apareyador de formación, alumnu del pintor Eugenio Tamayo, lo mesmo que de Fernanda Álvarez y Tomás Alonso na Factoría Cultural d’Avilés y componente del Grupu Salinas de Pintura, Enrique Uría cunta na so haber con premios de pintura como’l de Santa María del Mar (añu 2004), amás de ser finalista del IV Premiu de pintura de la Xunta Xeneral del Principáu (2004). Coles mesmes, nel 2011 la so obra foi espuesta nel Palaciu de Valdecarzana.

Él mesmu esplica’l significáu de la esposición, cola que la Factoría da bona amuesa del talentu creativo del so alumnáu: “La idea ye dar a conocer l’estáu actual del procesu d’evolución del mio trabayu, que partió, como sueli ser habitual, de la representación figurativa a l’actual incursión na astracción y del  usu de técniques  como l’acuarela, oliu y na actualidá acrílicu, nel campu de la pintura, hasta les, para mi, fascinantes técniques del grabáu, cola so capacidá d’atracción para quien tenga un mínimu d’interés  en abrir a nueves conocencies, qu’en gran parte afayé nos talleres impartíos pola Factoría Cultural”.

De la so evolución artística dixo José Antonio Fernández Castañón, ex director del muséu de Belles Artes d’Asturies: “Enrique Uría pasó del paisaxe (figurativu) a l’astracción. Yá nun hai anécdota, namá atiende a elementos de forma, color, estructures, proporciones. Les sos obres actuales reflexen lo que se denomina como “paisaxe integrador”, que nun ye sinón lo que remembramos cuando’l paisaxe como entidá física yá sumió de la nuesa visión, dexó d’esistir como tal”.

  Categories: