Ennio Morricone y John Williams algamen el Premiu Princesa d’Asturies de les Artes

Ennio Morricone y John Williams algamen el Premiu Princesa d’Asturies de les Artes, que ye’l segundu galardón en fallase nesta 40ª edición dempués de que’l miércoles concediera’l Princesa de la Concordia a los sanitarios españoles.

El compositor italianu Ennio Morricone y l’estadounidense John Williams llograron esti vienres de forma compartida’l Premiu Princesa d’Asturies de les Artes 2020 al qu’optaben 42 candidatures procedentes de ventiún países.

El xuráu del Premio Princesa d’Asturies de les Artes 2020 quixo reconocer “el valor fundamental de la creación musical pal cine” cola distinción de Ennio Morricone y John Williams, “dos de los compositores vivos más veneraos en tol mundu” que “arriquecieron col so talentu cientos de películes”.

“Mientres Morricone construyó la so reputación poniendo música dende Europa al alloñáu oeste americanu, Williams treslladó l’espíritu de la tradición sinfónica vienesa a grandes ésitos de Hollywood”, señala l’acta sobro estos dos compositores, que la so “estensa y variadísima obra” tien de mancomún “la so esllumante capacidá pa trespasar xéneros y fronteres”. Dotaos d’una “inconfundible personalidá”, ente les sos obres atópense dalgunes de les composiciones musicales más icónicas del séptimu arte, que yá formen parte del imaxinariu colectivu”, destacó’l xuráu, que s’axuntó de forma telemática por causa de la crisis sanitaria del coronavirus.

Williams y Morricone, añede l’acta, amuesen “un dominiu absolutu tantu de la composición como de la narrativa, auniendo emoción, tensión y llirismu al serviciu de les imaxes cinematográfiques”. “Les sos creaciones lleguen inclusive a tresformales y tescendeles, sosteniéndose por sigo mesmes como magnífiques obres sinfóniques que s’atopen ente’l repertoriu habitual de les grandes orquestes”, conclúi’l fallu d’un premiu de candidatura propuesta pol escritor Juan Barja de Quiroga Losada