“Enigma Agustina” llega a la Filarmónica esti vienres

“Enigma Agustina” llega a la Filarmónica esti vienres pa sopelexar conocencies científiques entra la población polo xeneral y espertar vocaciones científiques ente les muyeres, cola primera de les actividaes que va desenvolver el Conceyu d’Uviéu en collaboración col CSIC tres la firma, la selmana pasada, d’un protocolu d’actuación.

La cita, presentada esta selmana pola conceyala d’Educación, Yolanda Vidal y la delegada institucional del Conseyu Cimeru d’Investigaciones Científiques n’Asturies, Ánxeles Gómez Borregu, va empezar güei vienres a les 19 hores. La entrada ye llibre hasta completar l’aforu.

La conceyala d’Educación, Yolanda Vidal, presentó esta selmana, al pie de la delegada institucional del Conseyu Cimeru d’Investigaciones Científiques n’Asturies, Ánxeles Gómez Borregu, la primera de les actividaes que va desenvolver el Conceyu d’Uviéu y el CSIC, tres la firma, la selmana pasada, d’un protocolu de collaboración ente dambes entidaes.  Esta primer cita va ser la proyección de “Enigma Agustina”, un falsu documental financiáu pola Fundación Española pa la Ciencia y la Tecnoloxía (FECYT) y l’Institutu d’Astrofísica d’Andalucía (IAA-CSIC), nel que, por aciu un personaxe inesistente, faise un resume de los finxos científicos más relevantes asocedíos n’Europa nel primer terciu del sieglu XX (faciendo especial fincapié en disciplines como la relatividá xeneral, la mecánica cuántica y la cosmoloxía).

Un documental, sorrayó la responsable d’Educación, “qu’entemez distintos llinguaxes, inclusive la copla, pa sopelexar conocencies científiques” pero tamién “la llucha de la muyer p’aportar a carreres científiques”.

Tres la proyección, que va empezar a les 19 hores, nel Filarmónica, va desenvolvese un coloquiu nel que van intervenir unu de los responsables de la idea orixinal de la película: el Doctor n’Astrofísica, Manuel González García (IAA-CSIC) y la periodista científica y actriz Natalia Ruiz Zelmanovich (ICMM-CSIC). Tamién van participar dos divulgadores asturianos: Pablo Alonso, físicu investigador del Institutu de Nanomateriales y Nanotecnología n’El Apurro y Teresa Valdés, científica del Institutu Nacional del Carbón. La entrada va ser llibre hasta completar aforu.

La siguiente de les cites entamaes pol Conceyu y el CSIC, va ser el Club de la Ciencia, que se va ufiertar nel mes de febreru.