ENCAXA2 aporta na nueva realidá del Teatru Xovellanos

ENCAXA2 ye una grabación – multicámara y en realidá virtual (VR) – de conciertos n’esclusiva, dientro de la caxa escénica del Teatru Xovellanos. Les grabaciones van llevase a cabu énte un grupu amenorgáu de públicu que va compartir l’espaciu de la caxa escénica col artista.

Gracies a la voluntá de tolos artistes, tratase d’actuaciones inédites que van ver la lluz per primer vegada nesti formatu intimista. Ensin posa, toles selmanes, vas poder esfrutar de conciertos esclusivos en directu de los artistes más innovadores de la escena musical independiente. Si nun quies movete del sofá de la to casa, ENCAXA2 tufiértate la posibilidá de visionar el conciertu pregrabado na canal de YouTube del Teatru Xovellanos, con unos estándares audiovisuales d’alta calidá.

L’accesu a la canal de YouTube ye dafechu gratuitu y ensin rexistru previu, y amás de la retresmisión, los usuarios van disponer de chats públicos nos que comentar tolo que vaiga asocediendo mientres el conciertu.

Los conciertos van tar afechos a la “Nueva Normalidá”, y van cumplir les necesaries midíes de seguridá ya hixene. El públicu va distribuyise n’asientos que van tar alloñaos ente sí.