Portada Política EMIR entama una Charra-homenaxe a Gaspar García Laviana

EMIR entama una Charra-homenaxe a Gaspar García Laviana

by asturnet

El vienres que vien, 30 de payares, de magar les 19:00 hores va tener llugar nel Palaciu de Valdecarzana d’Avilés una charra sobre la figura de Gaspar García Laviana, organizáu por EMIR y sofitáu por UNIDÁ. Na mesma, van intervenir un representante d’EMIR y Javier Arjona, miembru de Soldepaz Pachakuti y gran conocedor de la figura de García Laviana.

EMIR, según espliquen nun comunicáu, “fai asina alcordanza d’un de los asturianos más representativos na hestoria del sieglu pasáu, no que cinca a la defensa de los intereses de los más desfavorecíos, nesti casu en Nicaragua”.

Gaspar García Laviana ñació nel añu 1941 en Tiuya, conceyu de Llangréu. Quien lu conocidieron en señalalu como un home idealista de gran calidá humana, fondamente identificáu cola “xente esplotao” y con una sensibilidá pergrande pa colos problemes que vive Nicaragua: “onde la fame y la sede de xusticia del pueblu oprimíu reclama, más que’l consuelu de les pallabres, el consuelu de l’aición” . Estes pallabres últimes tán recoyíes en so carta-testimoniu que lleó a los feligreses desplicando la so decisión d’ingresar nel “Frente Sandinista de Liberación Nacional (FSLN)”.

En Navidá de 1977, decide a la fin poner en práutica la idea que tuviera camentando por dalgunos meses ya ingresa como militante nel Frente Sandinista (FSLN). La vida de “Martín”, esi foi’l so nome de guerra, dientro de la organización ta enllena de grandes momentos colos sos collacios; como él dixo una vegada “equí tengo alcontrao a grandes amigos del alma”. Nel intre de la so muerte, a los 37 años, dirixía una de les columnes qu’operaben na zona sur del país y formaba parte del Estáu Mayor del Frente Sur “Benjamín Zeledón”.

Tamién te podria gustar