Portada Comunicación Elia Barceló alzase col premiu nacional de Lliteratura Infantil y Xuvenil 2020

Elia Barceló alzase col premiu nacional de Lliteratura Infantil y Xuvenil 2020

by redacción asturnews

La escritora alicantina Elia Barceló foi galardonada col Premiu Nacional de Lliteratura Infantil y Xuvenil 2020, dotáu con 20.000 euros, pola so obra L’efectu Frankenstein, un llibru onde la pionera del xéneru fantásticu y la ciencia-ficción n’España, rinde homenaxe a la obra de Mary Shelley.

Según informó esti día al traviés de la so cuenta personal de Twitter el ministru de Cultura y Deporte, José Manuel Rodríguez Uribes, Elia Barceló (Elda, Alicante, 1957) foi la premiada nesta edición por esta obra publicada pola editorial Edebé onde introduz al llector nel sieglu XVIII, cuando la presencia pública de la muyer yera escasa o inesistente.

La obra, tamién galardonada nel so día col XXVII Premiu Edebé de Lliteratura Infantil, rinde homenaxe “a la tradición, al amor pola llectura, a los llibros, a Frankenstein, a Shelley… Ye una declaración d’amor a que yo sía quien soi agora”, en palabres de l’autora. La protagonista ye Nora, una estudiante de medicina del sieglu XXI, que va deber cohabitar cola sociedá del sieglu XVIII y encarar los choques culturales y dilemes morales de la dómina.

Barceló ruempe asina les riegles de la verosimilitud (ruempe la barrera de la vida y la muerte según la del tiempu viaxando d’una dómina a otra). El Ministeriu de Cultura y Deporte otorga esti galardón pa estremar añalmente a una obra d’autor español, escrita en cualesquier de les llingües oficiales del Estáu y editada n’España mientres el pasáu añu 2019.

Tamién te podria gustar