El XV Concursu de Dibuxu y Pintura al Aire Llibre llega a L.lena’l 24 de mayu

El Conceyu de L.lena va acoyer esti 24 de mayu’l Concursu de Dibuxu y Pintura al Aire Llibre que se celebra cada añu nel conceyu y que llega nesta ocasión a la so edición númberu quince. El certame va facese nun sitiu del conceyu que se-yos dirá a los concursantes el mesmu día que se faiga. Les inscripciones, pa les qu’entamó’l plazu’l pasáu 15 d’abril puen facese na Casa la Cultura de La Pola fasta’l miercoles 22 de mayu. En total, el concursu va repartir 4.268 euros en premios.

N’ediciones anteriores namás podíen participar artistes mozos, pero esti añu ábrese una categoría pa mayores de 30 años cola idea “d’afalar la promoción de los artistes asturianos de cualesquier edá”.

La técnica pictórica ye llibre y cada autor va poder presentar namás una obra. Na categoría Sénior, la empobinada a mayores de 30 años, el llenzu ha tener unes midíes comprendíes ente los 70×50 y los 170×140 centímetros, pal restu d’obres el formatu ye llibre.

El xuráu va tar presidíu pol alcalde de L.lena y formáu por delles persones con un prestixu reconocíu nel ámbitu de la pintura, va facese públicu’l 20 de setiembre d’esti añu y la entrega de premios va facese nel mes d’ochobreen “Les Feries”.