El xuráu de los Premios Timón 2016 ya tien candidatures

El xuráu de los Premios Timón 2016 ya tien candidatures
14 avientu 18:22 2015 Imprimir

El xuráu designáu pa fallar los Premios Timón 2016 esbilló ente, les numberoses propuestes presentaes a l’Asociación Cultural L’Arribada, les ternes venceyaes a les nominaciones en cada categoría. Esther García López, Xulio Berros y Ánxel Álvarez Llano son delles de les candidatures.

Asina, pal X Premiu Timón (autores en llingua asturiana o n’eonaviego) la terna fórmenla Esther García López, Xulio Berros y Ánxel Álvarez Llano; pal VII Premio Timón (autores asturianos en castellanu) concurren Pilár Sánchez Vicente, Olvido García Valdés y Herme G. Donis; y pal IV Premiu Timón de Cultura Asturiana nominóse a Ramón d’Andrés, a la Wikipedia n’asturianu y a Iniciativa pol Asturianu.

El fallu de los Premios va decidise nos díes prósimos y daráse a conocer el viniente sábadu 26 d’avientu, al entamu de la xornada última del eventu 10 años de L’Arribada que s’allugará nel Muséu Casa Natal de Xovellanos a partir de les 12 del meudía. Los gallardones correspondientes consisten nuna obra del escultor y ceramista xixonés Jesús Castañón pa cada modalidá, y van entregase mientres la cellebración de la edición oncena de L’Arribada.

Los ganadores anteriores fueron; del Premiu Timón, Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009), Roberto González-Quevedo (2010), Vicente García Oliva (2011), Antón García (2012), Miguel Rojo (2013), Xosé Bolado (2014) y Esther Prieto (2015); del Premio Timón, Luis Fernández Roces (2010), Juan Méjica (2011), Fernando Menéndez (2012), Gonzalo Suárez (2013), Carmen Ruiz-Tilve (2014) y Francisco García Pérez (2015); y del Premiu Timón de Cultura Asturiana l’Asociación Cultural Ensame Sidreru (2013), la Xunta pola Defensa de la Llingua Asturiana (2014)y l’Asociación pola Recuperación de Sidros y Comedies “El Cencerru” (2015).

Loading Facebook Comments ...