Portada Conceyos El Xuegu de la Pintura de Mabel Llavandera aporta al Barjola de Xixón

El Xuegu de la Pintura de Mabel Llavandera aporta al Barjola de Xixón

by redacción asturnews

El Xuegu de la Pintura ye una esposición, comisariada por Santiago Martínez, que se presenta como una oportunidá d’averanos a la obra de Mabel Llavandera nel Muséu Barjola de Xixón.

En «El xuegu de la pintura» ufiértase una selección de trabayos recién, dellos inéditos de l’artista Mabel Llavandera (Xixón, 1951) que, dende la so riqueza formal y iconográfica, evidencian un bagaxe artísticu escepcional nacíu de la so formación en Belles Artes, na Academia de San Fernando de Madrid, pero que llueu s’inxirió con ámbitos profesionales amestaos al Diseñu y, especialmente, a la Ilustración. Esti calter interdisciplinar favoreció que topemos énte una ceadora capaz de faer convivir diversos xéneros y estilos.

Al traviés d’un llinguaxe únicu, espresivu y sutil, preséntanos obres que tomen, dende la so personal aportación a los xéneros de la semeya, el paisaxe y el bodegón, hasta series tan entrañables (y un tanto esmolecedores) como «Xuguetes» y «Suite del calderín» o la orixinal instalación «El frisu eclécticu». Propuestes que tresmiten sensaciones atopaes, que sosprienden, capaces de provocar una sorrisa, pero tamién de llevanos a afondar n’asuntos tocantes a la esistencia, al tiempu y los sos estragos.

Artista con una trayectoria inequívoca de compromisu y sensibilidá colos derechos y énte la inxusticia, dende la década de los setenta implicase na reivindicación del papel del arte como preséu de concienciación y meyora social, xuniéndose a colectivos tan comprometíos como Arte n’Asturies o’l grupu Kula, y collaborando viviegamente na Asociación Feminista d’Asturies (AFA) con una implicación que llegó hasta los nuesos díes.

La esposición, comisariada por Santiago Martínez, ye una oportunidá d’averanos a la obra de Mabel Llavandera, esfrutar de la guapura de los sos olios, de la sonoridá y xenialidá de los títulos y de la coherencia d’un trabayu apináu de significaos, confirmando les sos propies palabres: La pintura siempres oxetiva xuna idea, pero los caminos polos que te lleva son infinitos.

Tamién te podria gustar